Dy turiste japoneze të cilat po drekonin në një restorant në Romë të Italisë, kanë mbetur të shokuara në momentin kur kamerieri u ka sjellë faturën.
Sipas turisteve, ato kishin porositur vetëm 2 pjata makarona me fruta deti dhe ujë, teksa për to atyre iu është dashur të paguanin 429 euro dhe 80 centë. Pas publikimit të faturës në rrjetet sociale, e cila u bë virale në pak kohë, erdhi edhe reagimi i pronarit të restorantit.
“Menyja e lokalit është shumë e qartë, gjithçka është e shkruar dhe e detajuar, mjafton të shohësh çmimet, asnjë pjatë me makarona nuk shkon më shumë se 16 euro. Për të paguar atë shifër vajzat do kenë marrë dhe peshk që tek ne është i freskët. Klienti e zgjedh dhe ne e gatuajmë”, u shpreh ai për mediat.
Në faturë është përfshirë edhe një tjetër çmim i kripur, i cilësuar si bakshish, me një vlerë prej 80 eurosh. Por sipas pronarit, bakshishi i cili varion nga 10 deri në 20% të faturës totale, nuk është i detyrueshëm për t’u paguar.
Rasti në fjalë ka bërë që shumë persona të shpërthejnë në kritika negative ndaj restorantit, duke i përkeqësuar edhe më shumë vlerësimet në ‘Tripadvisor’, të cilat edhe para kësaj ngjarjeje ishin përgjithësisht negative.
