Dy shtetas të shpallur në kërkim ndërkombëtar janë ekstraduar nga Londra dhe Belgjika në drejtim të Tiranës, të cilët akuzohen për vepra penale në fushën e krimit ekonomik e financiar.
Nga specialistët e Interpol Tirana u krye ekstradimi nga Belgjika drejt Shqipërisë, i shtetasit Kreshnik Kule, 35 vjeç.
Kule ishte arrestuar nga autoritetet policore në Belgjikë me qëllim ekstradimin drejt Shqipërisë, pas informacioneve të dërguara nga Zyra Qendrore Kombëtare Interpol Tirana, pasi Gjykata e Tiranës, në vitin 2016 e ka dënuar këtë shtetas me 10 vjet burg, për veprën penale “Mashtrimi”.
Ky person, në bashkëpunim me të atin, në vitin 2008 kanë mashtruar një shtetas shqiptar dhe i kanë marrë shuma të konsiderueshme parash, rreth 30 mijë dollarë, duke i premtuar që do të mundësonin dërgimin e tij dhe të familjes së tij në Kanada.
Po nga specialistët e Interpol Tirana u krye ekstradimi nga Londra drejt vendit tonë i shtetasit shqiptar S.P. 40 vjeç, lindur në Fier.
Ky person ishte shpallur në kërkim ndërkombëtar, pasi Gjykata e Fierit, në mars të vitit 2018 ka caktuar masën e sigurisë “Arrest me burg” për veprat penale “Falsifikim monedhash”, “Falsifikim i dokumenteve” dhe “Falsifikim i letërnjoftimeve ose vizave”.
Si rezultat i bashkëpunimit të Interpol Tirana me Interpol Manchester u bë i mundur arrestimi dhe ekstradimi i tij nga Britania e Madhe drejt vendit tonë.
