Plot 250 mijë shqiptarë presin me padurim listën fituese të aplikantëve të Lotarisë Amerikane, e cila do të publikohet nesër.
Njoftimi zyrtar i përzgjedhjes do të mund të kontrollohet duke filluar nga nesër në faqen e internetit të Departamentit Amerikan të Shtetit, Byrosë së Çështjeve Konsullore Programit të Vizave të Shumëllojshmërisë.
Kjo është e vetmja mënyrë që tregon nëse jeni përzgjedhur fitues, pas aplikimit për Programin e Lotarisë DV-2018, ndërsa duhet të dini se çdo njoftim tjetër me anë të postës elektronike, apo me postë nuk është i ligjshëm.
Vetëm në rast se jeni përzgjedhur, si dhe pasi të ketë filluar shqyrtimi i rastit tuaj, vetëm atëherë ju do mund të merrni e-maile komunikimi nga QKK-ja, e cila ju njofton të shikoni Kontrollin e Statusit të Aplikimit për informacione të reja rreth aplikimit tuaj.
PËR TË PËRZGJEDHURIT:
Të përzgjedhurit e programit DV-2018 duhet të plotësojnë formularin elektronik DS-260. Sa më herët ta plotësoni formularin DS-260, aq më shpejt keni mundësinë e caktimit të datë së intervistës për vizë.
PËRGATITJA PËR VIZËN:
Udhëzimet për Përgatitjen për Vizë për të Përzgjedhurit e Vizave të Lotarisë (PDF 408 KB):
Përpara intervistës suaj për vizë, ne ju rekomandojmë të rishikoni të dhënat që keni dhënë në aplikimin tuaj fillestar për lotarinë. Sigurohuni që të keni dhënë informacionin e saktë mbi statusin tuaj civil në momentin e aplikimit fillestar. Nëse ju ishit i/e martuar në momentin e aplikimit fillestar për lotarinë, ju duhet të kishit përfshirë bashkëshortin/en tuaj në atë aplikim fillestar (edhe nëse keni qenë në proces divorci). Përjashtim bëjnë rastet kur bashkëshorti është nënshtetas Amerikan, ose banor i Përhershëm i Ligjshëm.
Gjithashtu, ju duhej të kishit përfshirë të gjithë fëmijët tuaj të pamartuar dhe nën 21 vjeç në momentin e aplikimit fillestar. Me fëmijë nënkuptohen fëmijët tuaj biologjikë, dhe thjeshtërit – fëmijët e bashkëshortit/es tuaj, apo fëmijë që i keni birësuar ligjërisht, pavarësisht, nëse jetojnë me ju ose jo.
Sigurohuni që ju keni ngarkuar fotografinë e saktë për çdo pjesëtar të familjes në momentin e aplikimit fillestar për lotarinë. Ngatërrimi i fotografive në aplikimin fillestar do të rezultojnë në refuzimin e vizës për ju dhe familjen tuaj.
Mosdeklarimi i bashkëshortit/es ekzistues, apo i fëmijës ekzistues në momentin e aplikimit fillestar për lotarinë do të rezultojnë në refuzimin e vizës për ju dhe familjen tuaj. Çdo tarifë e paguar ndaj qeverisë së Shteteve të Bashkuara për aplikimin tuaj për vizë nuk rimbursohet. Nëse në momentin e aplikimit fillestar, ju nuk keni përfshirë një fëmijë ekzistues, apo një bashkëshort/e me të cilën ishit i martuar (pra, statusi juaj civil ishte “i martuar” në momentin e aplikimit fillestar), atëherë mos vazhdoni me procedurën e aplikimit për vizë.
