Një 22-vjeçar ka ndërruar jetë mbrëmjen e djeshme në burgun e Kumanovës. Viktima identifikohet si Labinot Misini.
Sipas të afërmve të të ndjerit, ai ishte ankuar nga gjendja shëndetësore dhe në mungesë të turnit të natës së mjekëve të burgut, sipas familjarëve, ai kishte pirë pilula të marra nga të burgosurit.
Ndërkohë, motra e tij, Liridona Misini, tha se në komunikimin e fundit që ka pasur me të, ditën e premte, vëllai i saj i ndjerë i ishte ankuar se nuk ndihej mirë.
Liridona bën thirrje që të hetohet rasti se përse nuk i është ofruar ndihma mjekësore vëllait të saj në kohë.
Autoritetet e burgut dhe të policisë ende nuk e kanë konfirmuar rastin, por jo zyrtarisht mësohet se gardianët nuk kanë thirrur urgjencën mjekësore me kohë.
Labinoti ishte dënuar me 9 vite burg, për një vepër që e ka kryer në moshën 12 vjeçare. Ndërkohë, sipas familjarëve të tij, ishte në burg që 15 vjeç.
