Lidershipi është veprim jo pozicion. Po cilat janë cilësitë që e ndajnë liderin nga të tjerët? Lider lind apo bëhesh? Ja disa cilësi karakteri përmes të cilave mund të njohim më mirë veten ose liderin tonë.
- Përqendrimi
Lidership do të thotë të marrësh vendime të rëndësishme, që jo të gjithë mund ti marrin. Një lider i mirë është gjithnjë i përqendruar në atë që do të arrijë, ai e di se çfarë i duhet për të marrë atë që meriton, për këtë arsye është gjithnjë i fokusuar te gjërat më të rëndësishme.
- Vetëbesim
Lideri i mirë ka shume vetëbesim. Ai ka vizion të qartë dhe i di veprimet e tij. Përllogarit pasojat e vendimeve dhe veprimeve që bën dhe është praktik. Një lider është empatik, ai përpiqet të kuptojë ata që e rrethojnë dhe të vendosë se çfarë do ishte më e mira për ndjekësit e tij.
- Transparenca
Lideri i mirë kurrë nuk do të bënte kompromise për të vendosur maska. Në të kundërt nuk do ta meritonte pozicionin e tij. Për të arritur më të mirën e mundshme nga bashkëpunimi me kolegët, lideri i mirë duhet të jetë 100% i hapur me të tjerët. Vetëm kështu të gjithë do të jenë të lirë të shprehin atë që mendojnë.
- Integritet
Shpesh herë punonjësit janë reflektimi i drejtpërdrejtë i vlerave të liderit që kanë në krye. Të qenit një lider me integritet është aftësia më e mirë për të përmirësuar produktivitetin e punës edhe pse nuk je prezent në çdo moment pranë punonjësve të tu. Nëse një lider i qëndron me përpikmëri kornizave të asaj që duhet dhe s’duhet bërë, në të njëjtën kohë ai ka kufizuar potencialin e biznesit të tij.
- Frymëzim
Nëse lideri nuk i frymëzon ndjekësit e tij, e sigurt që është larg të qenit lider. Lider nuk mund të bëhesh, detyrimisht do të udhëhiqesh nga dikush. Personi që të udhëheq është dikush tek i cili ti beson, gjen parimet që do ndjekësh dhe emocionohesh nga arritjet e tij. Më pas ti do udhëheqësh dikë tjetër për ta ngjitur lart, vetëm kështu mund ta përmirësojmë shoqërinë, duke përmirësuar njëri tjetrin.
- Pasion
“Ti duhet ta duash atë që bën. Për të qenë vërtet i suksesshëm në diçka, duhet të fiksohesh në të, duhet ta lësh të të konsumojë.” Nuk ka rëndësi sa lart shkon biznesi yt, një lider i mirë është gjithmonë i emocionuar dhe i varur nga më e mira e mundshme. Ti udhëhiqesh nga shembuj jo sepse e ndjen se duhet ta bësh, por sepse është e vetmja rrugë ku mund të ecësh. Një lider i mirë bën çdo gjë me pasion. Në të kundërt nuk e bën mirë!
- Inovativ
Inovacioni është e vetmja armë që kemi përballë sfidave të ndryshimit. Bota rreth nesh ndryshon, dhe ne na duhet të vrapojmë për ta ndjekur. Lideri i mirë është gjithnjë gati të përshtatet me risitë, një lider s’ka kuptim larg risive. Të jesh i prirur drejt ndryshimit është çështje mbijetese.
- Durim
Durimi është kurajoja për të vendosur se kur duhet të qëndrosh për një kauzë, dhe kur vlen të largohesh nga ajo. Nëse vizioni i liderit është mjaftueshëm i qartë do të ketë mijëra arsye pse duhet “të vazhdosh” pas qindra mijëra dyshuesve. Rrugën sesi fitohet e kanë treguar ata që kanë zgjedhur se kur duhet të qëndronin, e se kur erdhi koha për tu larguar, me durim.
- Stoicizmi
Është e pashmangshme ti shpëtosh gabimeve. Ne vazhdimisht do ta gjejmë veten në situata të këqija, ku kemi përsëritur gabime, ose kemi pësuar dështime. Stoicizëm do të thotë të pranosh dhe të përdorësh këto gabime dhe dështime në funksion të së nesërmes. Një lider i mirë punon me mendjen, merr parasysh më të keqen dhe e ka një plan për çdo mundësi.
- Palëkundshmëri
Një lider i mirë është i patundur. Ai e di se impakti i parimeve të tij tek njerëzit që e rrethojnë është shumë i madh, prandaj dhe kujdeset që këto parime të jenë norma sociale në mjedisin ku qëndron. Lideri i mirë është gjithnjë gati të mbrojë analizat dhe opinionet e tij, të debatojë për vendimet e marra, por mbi të gjitha është i vendosur për të mos u tërhequr në kompromis me biznesin.
- Autenticiteti
Lideri i mirë dëgjon nga të tjerët, lexon mendimet e të tjerëve, kërkon të marrë më të mirën e aftësive të liderëve të tjerë dhe të mishërojë tek vetja një bashkim të cilësive që i pëlqejnë. Por një lider i mirë kurrë nuk e humbet autenticitetin, zërin e brendshëm dhe analizën e tij racionale për të vendosur dhe zgjedhur. Ai mbetet vetvetja deri në fund, dhe lë pas historinë e tij.
- Mendje hapur
Një nga mitet me të mëdha të lidershipit thotë se liderët janë vizionarë largpamës dhe të dogmatizuar me vendime të marra në kohë, për të arritur qëllimin e tyre pavarësisht çdo gjëje. Nuk është e vërtetë. Një lider i mirë duhet të jetë mendje hapur. Të këshillohet me miqtë, me kolegët, sepse asnjë plan s’mund të jetë statik. Liderët fantastikë, investojnë zhvillojnë dhe mbajnë marrëdhënie fantastike.
- Të vendosur
Liderët e mirë e dinë qëllimin që duhet të arrijnë. E kanë gjetur dhe rrugën për ta arritur. Ata kanë marrë vendime në emër të disa kauzave për të cilat luftojnë dhe mbi të gjitha kanë vendosur ti çojnë deri në fund këto vendime.
- Personaliteti
Të qenit i vërtetë është një cilësi shumë e veçantë në këtë botë ku të gjithë imitojnë. Sa më shumë që një njeri mendon se si mund ti ndihmojë njerëzit dhe jo se çfarë njerëzit mund të bëjnë për të aq më i pëlqyer do jetë ai. Kjo nuk është një cilësi që të bën lider fantastik, por të bën lider të respektuar.
- Fuqizimi
Filozofia e lidershipit është bashkimi i vlerave dhe aftësive me të mira njerëzore. Liderët më të mirë jo gjithmonë kanë qenë më të talentuarit, por ata kanë ditur të kombinojnë aftësitë me punën, dashurinë dhe besimin te vetja. Një lider i mirë zbulon më të mirën e punonjësve të tij, dhe e vë këtë në funksion të përmirësimit të tyre.
- Pozitiviteti
Për të arritur më të mirën duhet të kultivohesh me optimizëm. Një lider i mirë e di që do ketë shumë ulje dhe ngritje, por biznesi do të qëndrojë koherent vetëm me pozitivitet. Por kujdes, kjo kërkon që lideri të jetë i patrembur. Ai duhet të besojë në të pamundurën.
- Bujaria
Qëllimi më i madh i një lideri të mirë është të japë më të mirën e tij. Ne rritemi si një masë e vetme, dhe aftësia e veçantë e një lideri mes turmës është mundësia që ai ka për ti ndihmuar të tjerët të rriten bashkë me të.
- Këmbëngulja
Këmbëngulja e mposht rezistencën. Një lider i mirë e mëson që shumë herët se gjërat e rëndësishme marrin kohën e tyre dhe pavarësisht çdo gjëje ata duhet të këmbëngulin në përmbushjen e tyre. Ajo që e ndan liderin nga bota është dëshira për të shkuar përtej vendit ku të tjerët ndalojnë.
- Mprehtësia
Një lider i mirë ka aftësinë që çdo ditë të depërtojë në mendësinë e punonjësve të tij për të ndarë gjërat e rëndësishme nga të tjerat. Është si mençuria, e cila përmirësohet në kohën nëse ti i kushton vëmendje, por duhet të jetë në themel të karakterit tënd. Kur mprehtësia e liderit është e lartë lideri duket si gjeni.
- Komunikimi
Nëse njerëzit nuk i dinë pritshmëritë e liderit të tyre dhe nuk i përmbushin është faji i liderit. Komunikimi është akt balance, i mban njerëzit të lidhur me njëri tjetrin dhe i afron. Lideri i mirë u tregon të tjerëve idetë dhe mendimet e tij, prandaj rrethohet nga njerëz të talentuar.
- Përgjegjshmëria
Është shumë e lehtë të fajësosh të tjerët për gabimet që ndodhin. Një lider i mirë nuk e bën kurrë këtë. Ai kërkon gabimet te vetja, dhe kjo nuk është vetëm përgjegjshmëri. Është karakter. Lideri i mirë nuk lëndon veten as të tjerët. Ai merr masa që gabimi të mos përsëritet.
- Pamjaftueshmëri
Lideri i mirë e udhëheq ekipin duke gjetur pikat e forta të secilit person. Ai nuk beson se skuadra e tij ka çdo përgjigje, nëse e beson këtë atëherë ai s’ka mjaftueshëm pyetje për ta. Lideri perfekt plotëson çdo mangësi të skuadrës së tij. / Burimi: Entrepreneur
Përshtati redaksia Tirana Today
