Me kalimin e orëve, edhe më shumë të dhëna përditësohen në lidhje me ekzekutimin e 35-vjeçarit në fshatin Bularat të Gjirokastrës. Mesa duket, efektivët e policisë shqiptare RENEA, s’kishin asnjë mundësi si të vepronin.
Detajet
Kostandin Kaçifas për disa orë ka rezistuar me armë automatike, ku me vete kishte 90 fishekë. Kjo është vërtetuar pas ekzekutimit të tij. Automatiku i viktimës ishte i përbërë me tre karikarorë, të cilat ishin bashkuar me ngjitës natriban. Në këtë formë, ai e kishte të garantuar për të rrezistuar gjatë rrethimit.
Veprimet hetimore
Veprimet hetimore të para i ka kryer Prokuroria e Gjirokastrës. Dosja i ka kaluar Prokurorisë së Krimeve të Rënda. “Në total janë sekuestruar 25 gëzhoja.
17 në vendin e ngjarjes ku u qëlluan efektivët e patrullës së policisë, dhe 8 të tjera pikërisht tek vendi ku u ekzekutua Kostandin Kaçifas”. Kështu ka thënë një burim pranë Prokurorisë.
Ky i fundit shtoi për “Shqiptarja.com” se Kostandin Kaçifas ka qëlluar patrullën e policisë pa paralajmërim, dhe pa bërë asnjë debat me policët.
Kostandin Kaçifas, njihet si person ekstremist. Sipas burimeve, plani i tij ishte ekzekutimi i policëve dhe largimi më pas në drejtim të Greqisë.
Efektivët e RENEA-s kanë bërë ekzekutimin e 35-vjeçarit, sapo ky i fundit ka hapur zjarr ndaj tre negociatorëve të RENEA-s.
Sapo ai ka hapur zjarr, është qëlluar me disa plumba, duke i shkaktuar vdekjen e menjëhershme.
Rrethimi i Kaçifas, 20 efektivë në terren
Kanë qënë plot 20 efektivë të repartit RENEA, ata që kanë bërë rrethimin e Kaçifas në zonën e quajtur depoja e ujit të fshatit Bularat.
Në operacion ishin aktivë 20 efektivë, ndërkohë nga këta, 3 mësohet të kenë qënë negociatorë me Kostandin Kaçifas.
Ata disa herë e kanë paralajmëruar që të lerë armën në tokë dhe të vetëdorëzohet.
Negociatorët i kanë bërë të ditur Kostandin Kaçifas, të gjitha të drejtat e tij ligjore, që të dorëzohej dhe se pas dorëzimit do i vihej në dispozicion një avokat mbrojtës për ti mbrojtur pozitën ligjore të tij. Por megjithëse negociatorët janë përpjekur të zbusin situatën dhe të qetësojnë gjëndjen e personit që kishin rrethuar, ai sërisht ka reaguar me armë duke qëlluar 8 plumba në drejtim të tyre.
Menjëherë sapo ka qëlluar, RENEA ka bërë goditjen e rradhës, duke i shkaktuar vdekjen e menjëhershëm.
