Konstantinos Kacifa, 35-vjeçari i minoritetit grek që mbeti i vrarë pas sulmit mbi policinë shqiptare, pritet të përcillet në banesën e fundit. Në të dyja anët e kufirit, ka numër të dyfishuar sportelesh. Masat e sigurisë përfshijnë përveç kontrolleve edhe skanimin e të gjithë autobusëve dhe mjeteve që po hyjnë në Shqipëri, për ceremoninë mortore.
Autobusët janë nisur nga qyteti i Selanikut, Volosit, Athinës, Patras dhe Janinës. Më shumë se 2.000 njerëz pritet të jenë në funeralin e 35-vjeçarit, Kacifas. Ky i fundit mbeti i vrarë më 28 tetor në Bularat të Gjirokastrës, pas një shkëmbimi zjarri me forcat speciale RENEA.
Policia ka ushtruar kontrolle të rrepta në kufi, për personat që do të marrin pjesë në ceremoninë mortore. Policia shqiptare në bashkëpunim me atë greke, kanë përpiluar një listë për të shmangur personat me prirje ekstremiste. Kontrollet janë kryer në të 2 doganat. Në Bularat policia nuk do të jetë e pranishme me uniformë, për të shmangur ndonjë provokim të mundshëm. Nuk ka informacion për ndonjë skenar të mundshëm.
Vijnë autobusët nga Greqia
Ora 05:30- Kanë mbërritur në Kakavijë shtetasit e parë grekë, që do të marrin pjesë në varrimin e minoritarit grek Kostandinos Kacifas. Autobusi i parë nga Athina mbërriti rreth orës 5.30. Në pikën kufitare të Kakavijës ka pasur procedura të shtuara sigurie, me forca të shumta policore, skanim i autobusit dhe kontroll fizik i pasagjerëve.
Një prej pasagjerëve të autobusit grek ka thënë se do nderojnë heroin, ndonëse nuk është pjesë e familjes së tyre.
“Kemi ardhur nga Athina për të qenë në varrim. Nuk e kemi familje heroin, por ishte shumë e rëndësishme për ne ta nderojmë. Në kufi nuk ishte e vështirë të kalonim”.
Një tjetër ka thënë se janë të shumtë ata që pritet të nderojnë 35-vjeçarin.
“Unë jam nga Athina, sapo mbërritëm për ceremoninë e varrimit. Jam këtu për të nderuar heroin tim, heroin tonë. Shumë të tjerë janë pas nesh, nuk e di saktë numrin e atyre që po vijnë, por janë shumë”.
https://tiranatoday.com/i-katsifas-ndalohet-ne-kufi-nje-furgon-ishin-veshur-me-bluza-te-zeza-ku-shkruhej-vorio-epir-greket-vijne-pa-zbardhur-dita/
