Një ditë pas arrestimit të Martina Pajollarit, pasi akuzohet se ka marrë pjesë në vrasjen e Martin Çeços në Korçë, në pah kanë dalë detaje të reja. Duket se ajo ka qenë arsyeja e konfliktit mes viktimës dhe autorit kryesor Valter Mollaj. Martina mbante lidhje të dyfishtë, ndërsa në sy të Valterit shprehej se Martini e detyronte për të qëndruar me të, gjë që nuk rezulton e vërtetë.
Nga hetimet ka rezultuar se vajza 18-vjeçare ka qenë e pranishme në momentin që Valteri me dy të arrestuarit e tjerë, bënin planin për vrasjen e Martinit. Ndërsa sipas informacioneve, ajo ka qenë po ashtu e pranishme në momentin që u krye vrasja.
Këto janë detaje që janë mundur të zbulohen gjatë hetimeve, duke hedhur dritë më tepër mbi ngjarjen e rëndë të ndodhur në qershor. E reja u arrestua të premten nga policia e Korçës, pasi gjykata ka miratuar kërkesën e prokurorisë për caktimin e masës së sigurisë “arrest me burg”. Me arrestimin e 18-vjeçares, shkon në 4 numri i të ndaluarve për vrasjen e 16 qershorit.
Si ndodhi vrasja e Martin Çeços?
Trupi i pajetë i Martin Çeços u gjet më 16 qershor 2022, në rezervuarin e Kolanecit në Maliq. Ai ishte raportuar i zhdukur në polici nga i ati, më 12 qershor. Në trupin e 26-vjeçarit u konstatuan shenja dhune, ç’ka nxiti dyshimet se mund të ishte vrarë.
Bleti Angjo, Valter Mollaj dhe Edlir Mollaj janë pas hekurave për vrasjen e Martin Çeços. Ata akuzohen se e kanë mbytur me litar dhe kishin lënë pantoflat e Çeços buzë rezervuarit për ta bërë të dukej si vetëvrasje. Autorët e dyshuar e kanë marrë Çeçon dhe e kanë çuar në rezervuar, ku më pas e kanë vrarë me litar dhe e hodhën trupin në ujë për ta inskenuar si vetëvrasje.
