Ish-ministri i Drejtësisë Ylli Manjani ka apeluar për arrestimin e policëve që sipas tij dhunuan 18-vjeçarin Daniel Drobaj, i cili akuzohet për plagosjen e efektives Ina Nuka. Ai shkruan në Facebook se thyerja e gishtave si ndëshkim hakmarrës të 18 vjeçarit, është torturë dhe trajtim çnjerzor. Sipas tij, është shteti ai që duhet të prangosë dhunuesit, që hakmarrja të mos marrë jetë njerëzisht më vonë.
“Burg pa afat” ka qenë masa e sigurisë vendosur nga trupa gjykuese ndaj të riut, teksa avokati mbrojtës, në përfundim të gjyqit u shpreh se Dobraji shoqëruar nga i ati, ishte nisur drejt policisë për t’u dorëzuar, para se të arrestohej. Avokati i tij shtoi se Prokuroria nuk ka asnjë provë, që të faktojë plagosjen e efektives nga i riu.
“Prokuroria nuk ka asnjë provë që klienti im ka hedhur kapsollen drejt efektives së policisë. Ai ka pranuar, se ka pasur kapsolla dhe i ka hedhur ato drejt llamarinave të Namazgjasë. Në lidhje me kundërshtimin e forcave të policisë, klienti ka dalë në mbrojtje të banesës së tij, nuk ka dhunë ndaj policisë. Ai nuk ka pranuar ta shoqërojnë me makinën e policisë. Paraqita para Gjykatës kërkesat e familjarëve të tij. Ka qenë një çështje minutash, ku i ati e ka nxjerrë nga banesa për ta dorëzuar”, tha dje avokati i 18-vjeçarit.
