Kickboxer-i i famshëm shqiptar, Florian Marku ka përcaktuar datën dhe kundërshtarin e radhës me të cilin do të përballet në Tiranë, më 18 Maj në “Asllan Rusi”. Ashtu si e kishte paralajmëruar edhe kickboxeri nga Lushnja, kundërshtari i radhës do të jetë serbi, Sladjan Dragisic. Është ndeshja e parë që Marku organizon në Shqipëri dhe pritet me mjaft interes nga mbështetësit e tij.
Statistikat flasin në favor të Markut, pasi është i pamposhtur në kategorinë MMA, ndërsa serbi ka statistika më negative. Sladjan Dragisic në duelet e MMA regjistron vetëm dy fitore nga shtatë përballje të zhvilluara deri tani, ndërsa nga ana tjetër Marku në pesë sfida të zhvilluara në MMA është i pamposhtur.
Florian Marku, herën e fundit që zbriti në ring kishte përballë boshnjakun, Dzevad Mutfic. Në një atmosferë të jashtëzakonshme në Linz të Austrisë, shqiptari ka mposhtur boshnjakun Dzevad Mutfic, duke arritur të marrë fitoren.
Fillimi ishte disi i vështirë për shqiptarin, i cili u gjend në vështirësi pas një kapje të kundërshtarit, ndërsa ky i fundit pretendoi edhe për një dorëzim të Markut. Por, gjyqtari vendosi vazhdimin e ndeshjes, ndërsa Marku reagoi menjëherë duke i lëshuar një goditje të fortë në fytyrë kundërshtarit, i cili përfundoi i gjakosur.
Për rrjedhojë, nuk vonoi as dorëzimi i boshnjakut, i cili u dorëzua, duke i dhënë fitoren shqiptarit, që bëri krenarë mijëra mbështetës në mbarë botën.
