Recep Tayyip Erdogan, ‘‘The Guardian’’/“Sot në Turqi është përvjetori i grushtit të shtetit të 15 Korrikut. Plot një vit më parë miliona Turq, e gjithë politika, duke lenë mënjanë ndasitë etnike dhe kulturore, u bënë një trup kundër atyre që kërkuan pezullimin e kushtetutës dhe puçistëve që bombarduan Parlamentin dhe goditën civilët e pafajshëm.
Në këtë qëndresë humbën jetën 250 persona dhe mbetën të plagosur 2193 të tjerë. Qeveria ime, përpjekjen e nxjerrjes përpara ligjit të Fethullah Gylenit nuk e shikon të rëndësishme vetëm për Turqinë, por për demokracinë e çdo vendi. Mes viteve 1960 dhe 1997 të paktën katër qeveri të zgjedhura janë rrëzuar nga pushteti në mënyrë të padrejtë nga ana e ushtrisë.
Në të njëjtën kohë kombi ynë nuk shpëtoi plotësisht nga keqpërdorimi i kompetencave të të zgjedhurve në të kaluarën. Dhe më e keqja, kryengritjet ushtarake, besimin që populli Turk kishte për institucionet shtetërore e ulën në nivel më të ulët.
Puçistët i ranë murit me kokë
Nga koha e ardhjes në pushtet në vitin 2002 e deri më sot, Partia për Drejtësi dhe Zhvillim që drejtojë, i realizoi reformat duke u dhënë mbështetje dhe forcë përfaqësuesve të zgjedhur. Falë kësaj ia dolëm të ndërtojmë përsëri besimin e popullit tek institucionet publike. Puçistët që i drejtuan armët civilëve të pafajshëm në 15 Korrik i ranë murit me kokë.
Ky mur përbëhej nga zhvillimet 10 vjeçare që vazhdojnë në fushat politike, ekonomike, shëndetësi, drejtësi, politikë të jashtme dhe në të drejtat themelore. Kjo lidhje mes qeverisë dhe popullit është treguesi më i rëndësishëm i rezistencës së demokracisë dhe në të njëjtën kohë është garancia më e fortë për të mbajtur gjallë demokracinë.
Zmbrapsja e grushtit të shtetit është një pikë kthese për historinë e demokracisë. Kjo do të jetë një burim shprese dhe frymëzimi për të gjithë ata që jetojnë nën drejtimet diktatoriale. Për të ardhur keq që partnerët e Turqisë, kryesisht miqtë Perëndimor, nuk arritën të pranojnë rëndësinë e atyre që ndodhën.
Shumë vende Perëndimore në vend të jepnin mesazhe bashkimi me qytetarët e mi, preferuan të shikojnë duke pritur se si do të përfundonte kriza qeveritare dhe institucionale. Dyfytyrësia dhe standardet e dyfishta, e shqetësuan shumë thellë popullin turk i cili rrezikoi jetën për të mbrojtur liritë.
Njëkohësisht shumë vende Perëndimore që Turqia i kishte shpallur partnere dhe mike duke dashur ti hedhin kripë plagës, strehuan shumë drejtues të nivelit të lartë të organizatës që drejtohet nga Gyleni.
Nuk ka asnjë kuptim të përpiqesh të justifikosh këtë tradhti që i është bërë miqësisë së Turqisë. Sot përpara liderëve Perëndimor ka një zgjedhje: Ose do të zënë vend pranë terroristëve ose do të rifitojnë respektin e popullit Turk.
Feto po ngadalëson procesin gjyqësor
Nuk është e lehtë të luftosh me një strukturë tepër të fshehtë. Anëtarët e organizatës në mënyrë sistematike kanë depërtuar me fshehtësi në institucionet publike dhe kanë arritur në pozicione të rëndësishme duke u rritur prej vitesh në detyrë. Tani po përpiqen të ngadalësojnë proceset e gjyqësore pavarësisht provave konkrete që vërtetojnë fajësinë e tyre.
Vazhdojmë t’i qëndrojmë besnike drejtësisë. U formua një komision i pavarur që do të vlerësojë aplikimet e atyre që kundërshtojnë vendimet e dala. Qëllimi ynë është të forcojmë rezistencën e vendit tonë përballë sulmeve që mund të përjetohen në të ardhmen duke gjykuar deri në fund fajtorët.
