Policia e Shtetit, në bashkëpunim me Autoritetet Ligjzbatuese Greke në koordinim me Zyrën e DEA-s në Athinë, nën drejtimin e Prokurorisë Pranë Gjykatës së Shkallës së Parë për Krimet e Rënda Tiranë, finalizoi me sukses operacionin ndërkombëtar “KUITO”. Në këtë operacion u kapën 137 kg kokainë. Falë këtij bashkëpunimi me palën greke, dy persona ranë në pranga dhe një u shpall në kërkim.
Gazetari Artan Hoxha zbuloi në studion e “Report Tv”, se pas kësaj sasie lënde narkotike fshihet një grup i strukturuar kriminal, që vepron në Shqipëri prej 2 dekadash, dhe ka lidhje të forta politike nga të gjitha palët, pa u goditur asnjëherë nga policia.
Ai tha më tej se personi i identifikuar dhe i shpallur në kërkim, Gentian Malindi, është vetëm mbulim, pasi sipas tij, ‘peshqit e mëdhenj’ nuk dalin në lojë. Artan Hoxha tha se biznesi i peshkut që ka Malindi, është vetëm kamuflim, pasi qarkullimi financiar që sjell kjo sasi droge e kapur, tregon për potencialin që kanë grupet e organizuara shqiptare.
“Është rënë në gjurmët e një grupi shumë të madh, me një karrierë të gjatë në këtë fushë. Janë personazhe shumë të njohur, të fuqishëm në Durrës. Prandaj ata kanë pasur në dorë Portin. Ai të blen drejtorin e Portit, drejtorin e Policisë. Jemi në gjurmët e një grupi me karrierë shumë të gjatë në trafikun e drogës, me lidhje shumë të forta, një grup që nuk është goditur asnjëherë.
Uroj që Prokuroria të ketë faktuar lidhjet e këtij grupi me krerët, në mënyrë që të shkohet tek koka. Mendoni që Malindi do ta bënte vetëm 20 milionë euro? Me një anije peshkimi do trafikonte 20 milionë euro? Duke pasur parasysh njohjet, gjurmët e kësaj ngarkese të çojnë tek një grup shumë i njohur në Shqipëri, që asnjëherë nuk është goditur”, tha ai.
