Një 13-vjeçare nga Lezha ka paditur në polici bashkëjetuesin e saj 24 vjeçar për dhunë psikologjikë. Në njoftimin zyrtar policia e Lezhës bëhet e të ditur se me datë 09.10.2018 është plotësuar kërkesë padia për lëshimin e urdhrit të mbrojtjes të menjëhershëm për shtetasen A.G, vjeç 13, banuese në Lezhë, pasi dyshohet se bashkëjetuesi E.G, vjeç 24, banues në Lezhë, ka ushtruar dhunë psikologjike ndaj saj.
Të kontaktuar nga ‘News24’ dhe ‘BalkanWeb’, policia e Lezhës bën të ditur se 24-vjeçari nuk është arrestuar, ndonëse marrëdhënia me të mitur dënohet me ligj. Gazetarja Vitore Ndoj raporton për “BalkanWeb” se e mitura ka deklaruar në polici se është e dashuruar me 24-vjeçarin dhe se ka bashkëjetuar me vullnetin e saj.
Por e çuditshmja në këtë histori qëndron në faktin që sipas nenit 100, marrëdhënia seksuale ose homoseksuale me fëmijë të mitur, që nuk kanë arritur moshën katërmbëdhjetë vjeç ose me të miturën që nuk ka arritur pjekurinë seksuale, dënohet me burgim nga shtatë deri në pesëmbëdhjetë vjet, ndërsa rasti në fjalë është referuar si “masa ndaj dhunës në marrëdhëniet familjare”.
