Deklarata e ministrit të Jashtëm Kotzias se hapësira detare e Greqisë do të zgjerohet me 12 milje, ka shkaktuar reagimin e shumë personaliteteve.
Një ndër ta është edhe ish-ministri i Brendshëm, Dritan Demiraj i cili e konsideron shqetësues këtë lajm, por jo vetëm.
Sipas Demirajt, një tjetër shqetësim është edhe mungesa e qartësimit nga ana e ministrit të Jashtëm Ditmir Bushati.
“Mungesa e transparencës së bisedimeve Greqi-Shqipëri mund të paralajmërojë vendime penalizuese për territorin e Republikës së Shqipërisë”, shkruan Demiraj, teksa kërkon transparencën e plotë të bisedimeve.
Reagimi i Demirajt:
Të dashur miq,
Deklarata e ministrit grek Kotzias se ministri i Jashtëm i Shqipërisë, z. Ditmir Bushati ka pranuar zgjerimin me 12 milje të hapësirës detare të Greqisë, që përkthehet në brendësi të territorit detar të Shqipërisë është së paku shqetësuese.
Shqetësuese është fakti që këto lajme, po ashtu si dhe për mos bisedimin e çështjes Çame në tryezën e dy ministrave të Jashtëm, e mësojmë nga zyra e shtypit të ministrisë së Jashtme greke.
Ministri Bushati nuk i qartësoi këto vendime në daljet e tij publike të ditës së djeshme.
Mungesa e transparencës së bisedimeve Greqi-Shqipëri mund të paralajmërojë vendime penalizuese për territorin e Republikës së Shqipërisë.
Si qytetar dhe si njeri që i ka shërbyer vendit në shumë sfida sigurie, kërkoj transparencë të plotë të bisedimeve, duke filluar me zbardhjen e proçesverbaleve të takimeve dy palëshe. DD.
