Ish-ministri i Brendshëm teknik, Dritan Demiraj tha se Haki Çako kriminalizoi Policinë e Shtetit. I ftuar në rubrikën “Opinion” në studion e lajmeve në News24, Demiraj deklaroi se largimi i Drejtorit të Përgjithshëm të Policisë së Shtetit, Haki Çako, nga ministri Xhafaj ishte një veprim i mirë sepse ai ishte përgjegjës për këtë situatë që ka kaluar Shqipëria.
“Mospasja e një drejtori të ri të emëruar, krijohet rasti që grupet kriminale të veprojnë më me liri. Përshëndes veprimin e Xhafës për largimin e Haki Çakos. Pavarësisht se unë kam pasur një bashkëpunim me z. Çako, ishte koha për një ndryshim. Sepse ai ishte përgjegjës për këtë situatë që ka kaluar Shqipëria“, tha Demiraj.
Demiraj theksoi PS-ja mori drejtimin e policisë dhe largoi nga detyra personat e drejtuesit më të aftë. Ai deklaroi se policia e shtetit është e politizuar, pasi sipas tij që me ardhjen në pushtet të PS-së, u larguan rreth 900 punonjës, që sot kanë fituar gjyqet e nuk janë kthyer në punë.
“Policia e shtetit është e politizuar. Kjo nuk ka diskutim se që në javën e parë që PS mori drejtimin, largoi nga detyra personat e drejtuesit më të aftë të policisë. U larguan rreth 900 punonjës, që sot kanë fituar gjyqet e nuk janë kthyer në punë,” tha Demiraj.
Duke folur për gjendjen aktuale të Policisë së Shtetit në këtë 105-vjetor të saj, Demiraj theksoi se 2017-a ka qenë vit i rëndësishëm kundër kanabizimit të vendit, por kjo edhe falë opozitës që ka denoncuar me emra.
“2017 ka qenë një vit i rëndësishëm në luftën kundër kanabizimit të vendit, kjo për shkak të presionit ndërkombëtar dhe të opozitës në këtë çështje, e cila me emra ka denoncuar raste të rëndësishme.
Përfshirja në trafikun e drogës është një njollë e zezë për policinë, por nuk mund të themi që policia nuk ka punuar mirë,” deklaroi Demiraj.
