Përvjetori i dhjetë i pavarësisë, e gjen Kosovën në pozitën më të keqe të mundshme. Krimi i organizuar dhe korrupsioni në administratën shtetërore është i shumë-përhapur, tensionet ndër-etnike janë rritur, njohja ndërkombëtare e shtetësisë ka ecur me hapa të ngadaltë, ndërsa procesi i integrimit euro-atlantik është futur në ngërç.
Aktorët dhe faktorët politikë kryesorë në Kosovë, vetëm sa kanë ndërruar vendet në mazhorancë apo opozitë.Ekonomia është anemike, ndërsa jetesa e shumicës së kosovarëve mbetet në kufijtë e mbijetesës.
Dy vite më parë, BE paralajmëroi se Kosova ishte shumë pranë liberalizimit të vizave me vendet e hapësirës Shengen.Tani kjo perspektivë është zbehur për shkak të mosmiratimit të marrëveshjes kufitare me Malin e Zi, ngritjes së Gjykatës Speciale për krimet e dyshuara të pjesëtarëve të veçantë të UÇK, dhe ngritjes së Bashkësisë së Komunave Serbe.
Serbia po ecën më hapa të shpejtë drejt anëtarësimit në BE, teksa bisedimet mes dy vendeve për normalizimin e raporteve, janë pezulluar për një kohë të pacaktuar, pas vrasjes së politikanit të njohur të serbëve të Kosovës, Oliver Ivanoviç. Kosova është një shtet i dështuar, shkruante qershorin e 2017-ës në një analizë të gjatë revista gjermane “Der Spiegel”, duke theksuar se vendi është në duart e një klani të vogël që fiton miliarda dollarë, dhe që është shumë më i ngjashëm me Botën e Tretë, sesa me një vend evropiano-perëndimor.
“Gabimi që bëri Perëndimi, është se e la Kosovën në dorë komandantëve, që u lavdëruan si “ushtarë të lirisë”, por në shumë raste kanë rezultuar të jenë luftëtarë të krimit”- theksonte revista.
Edhe ish i dërguari i BE-së për Kosovën, diplomati austriak Volfgang Petritsh, deklaroi dhjetorin e vitit të kaluar se Kosova, është mjerisht një shtet ende i dobët dhe pranë kolapsit.Ndërkohë eksperti amerikan për rajonin Daniel Server, gjykon se do të duhen edhe të paktën 10 vjet të tjera, para se Kosova të kompletohet dhe konsolidohet si shtet. Alket Goce, Tirana Today
