1 në 10 vdekje ndodh për shkak të prijes së duhanit. Ky është përfundimi i arritur nga revista mjekësore “The Lancet’. Kështu, pavarësisht përpjekjeve për kontrollin e politikave të duhanpirjes, me rritjen e popullsisë, është rritur edhe numri i duhanpirësve.
Shifrat e publikuara nga ky studim janë të frikshme: gati 1 miliard njerëz konsumonin duhan në bazë ditore, në vitin 2015, ndër të cilët 1 në 4 burra dhe 1 në 20 gra.
Raporti i titulluar “Barra globale e sëmundjeve” u bazua në zakonet e duhanpirjes në 195 vende dhe territore, mes vitit 1990 dhe 2015.
Emanuela Gakidou, autore e studimit të kryer u shpreh: “Pavarësisht provave të pakundërshtueshme mbi efektet e dëmshme të duhanit në shëndet, 1 në 4 persona në botë është duhanpirës i rregullt”.
Numri i personave që kanë vdekur nga duhanpirja është rritur me 4.7%, me një shifër “të frikshme” prej 6.4 milionë viktimash në vitin 2015.
Studiuesit thonë se vdekshmëria mund të rritet edhe më shumë, teksa kompanitë e prodhimit të cigareve po shënjestrojnë në mënyrë agresive, tregje të reja, veçanërisht tek vendet në zhvillim, shkruan Top Channel.
Sipas studimit, në vitin 1990 numri i duhanpirësve ka qenë 870 milionë, por shtimi i popullsisë në botë ka pasur një rritje të numrit total të duhanpirësve.