Operacioni i gjerë antidrogë i ditës së sotme ndaj bandës së Met Kananit ka sjellë në vëmendje edhe arrestimin e tij para disa muajsh në Turqi. Met Kanani ra në pranga bashkë me 11 shqiptarë në shtetin turk ndërsa trafikonin kanabis nga Shqipëria, në Greqi dhe më pas drejt Turqisë.
Ashtu siç paraqitet edhe në video, policia turke ndërhyri me shpjetësi duke sekuestruar 1.1 ton drogë me vlerë 5 milionë euro.
Kush është Met Kanani?
Mediat turke theksojnë faktin se Met Kanani, që njihet edhe me emrin Met shqiptari dhe cilësohet si “baron i madh i drogës” pasi kontrollon edhe rrugët e trafikut të heroinës nga Afganistani, Irani dhe Turqia drejt Europës.
Sipas mediave në Turqi Met Kanani është personi që ka tentuar të trafikojë në nëntor të 2017-së 1.6 ton kanabis që u kap nga Policia Greke pas një përleshje në det.Ka qenë Met Kanani personi që dyshohet se ka tentuar të çojë në Greqi këtë sasi droge, ku njerëzit e tij janë përplasur me Policinë, aq sa u desh ndërhyrja edhe e një helikopteri nga ajri për të prangosur personat që ishin në bordin e anijes që po bënte trafikimin e kanabisit.
Pavarësisht se u kapën njerëzit e baronit të drogës, Met Kanani nuk u arrit të arrestohej dot nga Policia Greke në atë kohë. Grupi që kryente këtë linjë narkotrafiku kishte lidhje të forta edhe me trafikantë italianë e grekë.
Si vepronte Met Kanani
Pasi kalonte nëpërmjet Greqisë dhe më pas në Turqi, kanabisi depozitohej në një depo që përdorej si biznes uji. Sapo droga kishte mbërritur në Turqi, Policia ka vendosur të ndërhyjë duke arrestuar Met Kananin dhe 11 persona të tjerë që ishin pjesë e grupit kriminal.
Operacioni i sotëm
Ndërsa ditën e sotme Operacioni ‘Forca e Ligjit’ në bashkëpunim ndërkombëtar me disa agjencitë ligjzbatuese vendase dhe të huaja është goditur një grup i strukturuar kriminal që operonte në disa shtete për trafikimin e drogave.
Drejtoria Hetimore Qendrore në Departamentin e Policisë Kriminale në bashkëpunim me Prokurorinë për Krime të Rënda, Drejtorinë e Forcës së Posaçme Operacionale dhe Drejtoritë Vendore të Policisë në Tiranë, Elbasan, Fier, Vlorë, Lezhë, Korçë dhe Shkodër, finalizuan me sukses operacioni ndërkombëtar policor të koduar ‘Precizoni’.
Në fund të veprimeve policore, u ekzekutua vendimi Nr.96, i datës 11 maj 2018 të Gjykatës së Shkallës së Parë për Krimet e Rënda, e cila kishte caktuar masën e sigurisë personale ‘’Arrest me burg’’, për 18 shtetas:
Met KANANI, 56 vjeç, banues në Fier (aktualisht në burg në Turqi).
Redjan DERVISHI, 26 vjeç (aktualisht në burg në Turqi).
Ruvin SPAHIU, 46 vjeç (aktualisht në burg në Turqi).
Besmir LLUPI, 32 vjeç, banues në Vlorë (aktualisht në burg në Turqi).
Mentor MUÇKA, 47 vjeç, banues në Pogradec (aktualisht në burg në Maqedoni).
Alfred SHABANI, 44 vjeç, banues në Gjirokastër.
Armando GJINI, 47 vjeç, banues në Rrëshen.
Iliro HARUNI, 43 vjeç, banues në Fier.
Orges ISLAMI, 40 vjeç, banues në Gjirokastër.
Arvanit ULNDREAJ, 26 vjeç, banues në Tiranë.
Klaudio ULNDREAJ, 25 vjeç, banues në Tiranë.
Florand XHABEJ, 43 vjeç, banues në Korçë.
Gojart JAHELEZI, 33 vjeç, banues në Tiranë.
Lavdim ÇUKU, 44 vjeç, banues në Përrenjas, Librazhd.
Klinsi ALIAJ, 23 vjeç, banues në Tiranë.
Nexhat MLLOJA, 53 vjeç, banues në Shkodër.
Andrea (Sadik) BALLA, 57 vjeç, banues në Prrenjas, Librazhd.
Bilbil HEQIMI, 58 vjeç, banues në Fier.
Gjithashtu u shpall në kërkim shtetasi S.R, banues në Librazhd.
Arrestimi i këtyre personave, u bë pasi Prokuroria pranë Gjykatës së Shkallës së Parë për Krime të Rënda Tiranë, në bazë të materialeve të referuara nga Drejtoria e Përgjithshme e Policisë së Shtetit, në Shkurt të vitit 2017, ka regjistruar procedimin penal lidhur me veprat penale të “Trafikimit të narkotikëve’’ kryer në bashkëpunim dhe ‘’Grup i strukturuar kriminal’’.
Këta persona vepronin si grup i strukturuar kriminal, për trafikimin e lendeve narkotike. Veprimtarinë kriminale e ushtronin në Shqipëri dhe në vende të tjera, kryesisht ato të Bashkimit Evropian.
TIRANA TODAY
