Julen Lopetegui u pa si shpëtimtari i Real Madridit pas largimit të Zinedine Zidane. Të gjithë drejtuesit në Madrid e dinin se largimi i francezit pas suksesit historik që arriti, do ti tregonte pasojat tek pasardhësit. Dhe kështu ndodhi, Lopetegui nuk arriti të motivojë si duhet skuadrën dhe paraqitjet e tyre në fushë linin për të dëshiruar.
Humbja në “El Clasico” ishte goditja fatale, të gjithë dolën me kokë ulur nga “Camp Nou” dhe e dinin që të nesërmen do të ishin pa trajner, sepse dikush duhet të sakrifikohej. Në kërkim të një emri të madh për të zëvendësuar Lopeteguin, Florentino Perez ia besoi përkohësisht drejtimin Santiago Solarit.
Trajneri i Real Madrid Castilla, në 4 ndeshje i ka befasuar të gjithë dhe është duke ecur në hapat e Zinedine Zidane. Solari ka sfiduar të gjithë trajnerët që ka pasur Reali nga fillimi, pasi 4 ndeshje radhazi sapo kishte marrë drejtimin e klubit nuk e kishte bërë askush në histori.
Fitoret e Solari-t me Los Blancos kanë qenë ndaj Melilla në Copa del Rey, Viktoria Plzen në Champions League, dhe Real Valladoilid me Celta Vigo në La Liga. Në këto ndeshje, Real ka shënuar 15 gola duke pësuar dy. Duke parë këtë ecuri pozitive, Florentino Perez ka emëruar Santiago Solari-n si trajnerin e përhershëm të klubit deri në qershor të vitit 2021.
