Partia Demokratike ka zyrtarizuar gjatë mesditës, marrëveshjen e koalicionit me PDIU.
Ka qenë vetë kryedemokrati Lulzim Basha, që e ka përcjellë këtë lajm, ndonëse ishte i pritshëm prej ditësh.
Basha i ka uruar mirëseardhjen PDIU-së në frontin opozitar.
Ai u shpreh se kjo është një ditë e mirë për të gjithë vendin, pasi misioni i vetëm i opozitës së bashkuar, do të jetë çlirimi i vendit nga qeverisja e krimit.
‘’Dua ti uroj mirëeardhjen në koalicion z. Idrizi. Opozita është në frontin më të gjerë me pjesëmarrjen e të gjithë aktorëve, në shërbim të interesit të qytetarëve në këtë moment kritik.
Opozita e bashkuar ka sot një mision që është fundi i bashkëqeverisjes me krimin, dhe largimi i kësaj qeverie. Të çlirojmë vendin nga pushteti i bandave, dhe të japim vizionin tonë për një ekonomi të fortë”, u shpreh Basha.
Takimi mes Idrizit dhe Bashës mund të cilësohet si fillimi i një bashkëpunimi të ri mes tyre, nisur edhe nga formati i takimit.
Basha shoqërohej nga Albana Vokshi dhe Edmond Spaho. Edhe Idrizi shoqërohej nga Mesila Doda dhe një tjetër zyrtar i PDIU-së. Takimi i tyre është “bekuar” nga një tjetër përfaqësues i jashtëm, nga të dy palët.
