Më 16 dhe 17 prill, Shqipërinë pritet ta vizitojë zv/kryeministri i Kinës, Zhang Gaoli, i cili do të takohet me Presidentin e Republikës, Bujar Nishani, si dhe me kryeministrin Edi Rama. Zhang do të kryesojë një delegacion të nivelit të lartë, si asnjëherë tjetër në 51 vitet e fundit.
Ambasadorja e Kinës në Shqipëri, Jiang Yu, tha se kjo është një ngjarje e madhe për marrëdhëniet Kinë-Shqipëri. Sipas saj, udhëheqësit e të dy vendeve do të bisedojnë për zhvillimin e mëtejshëm të marrëdhënieve dypalëshe.
“Vizita e zv.kryeministrit kinez, Zhang Gaoli, pa diskutim do të ketë kuptim të rëndësishëm historik e realist mbi thellimin e miqësisë tradicionale kinezo-shqiptare dhe të besimit reciprok mes dy palëve. Vizita do të shërbejë gjithashtu për të nxitur të dy vendet të arrijnë konsensuse të reja mbi bashkëpunimin konkret në fusha të ndryshme në kohët e sotme, gjë që do t’u sjellë gjallëri të dy vendeve”, theksoi ambasadorja Jiang.
Vizita e zv/kryeministrit kinez, Zhang Gaoli, njëherësh anëtar i Komitetit të Përhershëm të Byrosë Politike të Komitetit Qendror të Partisë Komuniste të Kinës (KQPKK), bëhet me ftesën e qeverisë shqiptare.
