Ditën e sotme do të prezantohet premiera e shfaqjes “Zoti i masakrës” në Teatrin Kombëtar të Kosovës.
Në këtë shfaqje, me tekst të Jasmina Reza e regji të Besfort Idrizit, luajnë aktorët Donikë Ahmeti, Shpëtim Selmani, May-Linda Kosumovic dhe Labinot Raci.
Jasmina Reza është një nga dramaturget më të famshme bashkëkohore në botë, si dhe fituese e çmimeve të mëdha, mes të cilave vlen të përmenden Molier, Laurence Olivier dhe Tony Award për autor më të mirë, nga të cilat çmimet Laurence Olivier dhe Tony janë pikërisht për dramën “Zoti i masakrës”.
Shfaqja është tragjikomike dhe bën fjalë për dy familje të shtresës së lartë shoqërore, që takohen për shkak se fëmijët e dy cifteve janë rrahur në shkollë.
Prindërit i diskutojnë shkaqet dhe problemet e mundshme që mund të dalin nga një sjellje e tillë e papërshtatshme të fëmijëve të tyre. Por, pavarësisht pritjes së tyre që do të gjejnë zgjidhje të shpejtë dhe racionale, ndodh krejt e kundërta.
Shfaqja është kamertale dhe fokusohet më tepër në lojën e aktorëve dhe përpjekjeve të gjetjes së zgjidhjeve të problemeve të personazheve, sesa në elementet dhe efektet tjera skenike deskriptive.
