Shumë pikëpyetje u ngritën nga banorët dhe policia, në lidhje me zjarret në çerdhe, brenda një harku të shkurtër kohor. Pas pesë ditëve, ku dy çerdhe u përfshinë nga flakët, kanë dalë edhe konkluzionet pas këqyrjes nga ekspertët zjarrfikës.
Në sajë të hetimeve të kryera në këtë drejtim, është arritur në përfundimin se vënia e zjarrit ka qenë e qëllimshme. Burime nga Policia e Tiranës thanë se në rastin e çerdhes në “Ali Dem”, është gjetur tubi i gazit i prerë. Ndërsa në rastin e çerdhes nr 16, në dhomën e fjetjes së fëmijëve, në disa shtretër me largësi 2-3 m nga njëri-tjetri janë gjetur vatra zjarri.
Dje një zjarr përfshiu çerdhen nr. 16, në rrugën “Nikolla Tupe”, në Tiranë. Nga zjarri pati vetëm dëme materiale. Ndërkaq, më 16 gusht magazina e çerdhes nr.14 në zonën e “Ali Demit”, u përfshi nga zjarri si pasojë e shpërthimit të gazit nga një bombol gatimi.
https://tiranatoday.com/dy-cerdhe-perpihen-nga-flaket-brenda-5-diteve-cfare-po-ndodh/
Në lidhje me këtë situatë kaotike, një reagim është përcjellë edhe nga deputetja demokrate, Albana Vokshi, e cila ka bërë përgjegjës të vetëm kryebashkiakun Veliaj.
Ajo parashtron pyetjen nëse seriali i zjarreve ka ardhur si pasojë e investimeve të dyshimta të Veliajt. Vokshi thotë se çerdhet, kopshtet, shkollat, janë kthyer në godina “rrezik vdekje”, sepse fondet vidhen për llogari të kreut të Bashkisë, Erion Veliaj. Po kështu, ajo ka kërkuar ndihmën e prindërve, që të organizohen, dhe të mos heshtin për këto ngjarje.
