Manchester United nuk e ka nisur kampionatin në mënyrë të mirë dhe duket se ka probleme të mëdha. Pas çdo ndeshje pozicioni i Jose Mourinhos në krye të “Djajve të Kuq” vihet më shumë në diskutim. Ai ka probleme me lojtarët dhe kjo mund të sjellë më të keqen për të, pavarësisht se drejtuesit i kanë dhënë besimin e duhur për të vazhduar punën i qetë.
Kur janë luajtur vetëm dy ndeshje në Premier League kanë filluar të qarkullojnë edhe emrat që do të zëvendësojnë portugezin dhe favoriti është Zinedine Zidane. Ish-lojtari i United, Lee Sharpe është shprehur se ish-trajneri i Real Madrid është perfekt për të drejtuar Manchesterin. Mourinho duket se nuk është i përkushtuar maksimalisht me ekipin, pasi ka mbetur i pakënaqur nga afrimet e merkatos së verës, pasi drejtuesit nuk ia plotësuan dëshirat.
“Mourinho nuk ka asnjë plan për ekipin. Asnjë lojtar nuk e di ku duhet të shkojë dhe çfarë duhet të bëjë. Kam dëgjuar fjalë se ai nuk iu jep instruksione lojtarëve para ndeshjes, i lë të lirë të luajnë siç duan vetë. Kjo ka ndodhur për shkak të pakënaqësisë së tij në lidhje me afrimet në merkaton e verës”, tha Sharpe.
“Mendoj se Zidane do të ishte kandidati ideal. Ai ka luajtur në nivelin më të lartë, ka drejtuar në nivelin më të lartë dhe ka qenë i suksesshëm në të dyja. Ai është një emër mjaft i madh që mund të përballojë presionin dhe pyetjet e kërkuara për menaxhimin e një klubi të asaj përmase, kështu që unë mendoj se ai do të ishte ideale”, vijoi më tej ish-lojtari i United.
