Real Madrid pësoi një humbje surprizë nga Girona në xhiron e javës së 10 në La Liga dhe thellon diferencën nga Barcelona kryesuese me 8 pikë. Tekniku francez i madrilenëve Zidane nuk e quan një tragjedi dhe theksoi se është i kënaqur me lojën që bënë çunat në fushë por në futboll ka dhe episode jo të mira.
“Sot humbëm tre pikë dhe jemi tetë pikë pas Barcelonës. Por, ne e dimë se do të kemi ditë të mira dhe do të rikthemi. Në futboll vendosin detajet. Këtë nuk e kishim planifikuar, por më nuk ka kthim mbrapa dhe duhet të shikojmë para. Nuk pajtohem me atë se Reali nuk ka luajtur mirë, djelmoshat dhanë gjithçka në fushë. Është e vërtetë se na mungoi koncentrimi në fillim të pjesës së dytë. Kishim dy raste të mira për të shtuar epërsinë në 2:0, por nuk i konkretizuam. Sido që të jetë, do ta shikojmë përsëri ndeshjen dhe do të shohim ku kemi gabuar”, theksoi mes tjerash Zidane.
Real Madrid vinte në këtë ndeshje nga një formë mjaft e mirë pasi kishte 5 ndeshje radhazi që fitonte në kampionat. Përballja me Gironan dukeshe e lehtë në letër, por në fushë rezultoi ndryshe pasi ata e kërkuan më shumë fitoren. Madrilenët kishin mundësi ta mbyllnin ndeshje më herët por nuk ishin të pasaktë në finalizim, kjo bëri që dy episode të vendosnin fatin e ndeshjen në ato minuta ku futbollistët e Realit ishin të çoroditur në fushën e lojës.
