Lideri i Aleancës për shqiptarët, Ziadin Sela ka konfirmuar se partia e tij mbetet pjesë e koalicionit qeveritar, duke hedhur poshtë spekulimet për daljen nga qeveria.
Sela shtoi se këto janë zgjedhje lokale dhe si partner koalicioni deri më tani, nuk ka pasur aspak biseda me kryeministrin Zoran Zaev.
“Mbetemi në qëndrimin se informatat për dalje nga Qeveria janë spekulime, pjesë e propagandës së BDI-së. Kjo ishte edhe në rrethin e parë të zgjedhjeve, jo vetëm në të dytin. Tërë kohën spekulojnë, dezinformojnë se ne nuk jemi më pjesë e koalicionit qeveritar. Kjo bëhet me qëllim që t’i frikësojnë qytetarët. Është e qartë se si e zhvillojnë fushatën, dëshirojnë t’i frikësojnë, t’i shantazhojnë votuesit dhe qytetarët dhe në atë mënyrë të vijnë deri te rezultati më i mirë”, tha Sela i ftuar në emisionin Top Tema në TV Telma.
I pyetur nëse është i kënaqur nga hetimi i deritanishëm për dhunën në Kuvend të 27 prillit, Sela tha se duhet të bëhet shumë më tepër, jo sepse është personalisht i prekur, por para së gjithash për shkak të reformave në jurisprudencë, të cilat konsideron se po zhvillohen shumë ngadalë.
“Ne duhet të ndërtojmë të ardhme shumë më të mirë për fëmijët tanë, ndërsa kjo fillon me sistemin e jurisprudencës. Duhet të ndërtojmë gjyqësi të pavarur, jopartiake dhe vetëm në të rast do të jemi krenarë se kemi bërë punë të vërtetë. Ende ka kohë. Duhet t’i jepet kohë Qeverisë së re për t’u bërë këto reforma sepse ai është një proces. Prandaj edhe thamë se në një mënyrë jemi prijës të reformave”, tha lideri i Alenacës për shqiptarët, Ziadin Sela.
