Kryeministri Edi Rama ka mbledhur mëngjesin e sotëm qeverinë në qytetin e Vlorës ku sipas agjendës po zhvillon diskutimet mbi gjendjen e vendit, punësimin, administratën dhe alternativat e zgjidhjes së këtyre problemeve. Ashtu siç e ka përsëritur shpeshherë kreu i qeverisë është ankuar për situatën në të cilën gjendet administrata publike, edhe pse kjo e fundit ka qenë nën menaxhimin e qeverisjes së tij gjatë katër viteve të kaluara.
Megjithatë, kryeministri është “zgjuar” përgjatë muajve të fundit, duke nisur që nga retorika e përdorur në fushatën elektorale, ashtu si edhe tani kur ka nisur “qeverisjen me qytetarët”, sa i përket burokracisë në administratë.
Në komunikimin me qytetarët, Rama dhe ministrat evidentuan problematikat që has sot administrata, sipas të cilëve pjesa më e madhe e saj është e mbushur me analfabetë. Rama propagandoi sërish edhe ndalimin e certifikatave të printuara dhe domosdoshmërinë e përdorimit të atyre online. Ndërsa kërkoi korrektesë me punën dhe me shërbimin ndaj qytetarëve. Po ashtu kërkoi pastrimin e administratës, për të vendosur në të njerëzit e arsimuar dhe të aftë për të realizuar punën që u ngarkohet.
“Burimet njerëzore në administratën shtetërore, duhet të jenë në lartësinë e duhur për t’i shërbyer qytetarëve. Duhet të largojmë njëherë e mirë punonjësit analfabetë dhe ata që nuk kanë formimin përkatës, për t’i zëvendësuar me njerëz të arsimuar, të kulturuar dhe të aftë t’i shërbejnë qytetarëve. Pres që të gjithë drejtoritë të hartojnë një raport të detajuar, mbi burimet njerëzore dhe ta dorëzojnë në ministrinë përkatëse dhe në zv. Kryeministri”, tha Rama.
https://www.facebook.com/edirama.al/videos/10155224226961523/
