Ditët e fundit është folur gjatë që politika do të ndihmojë Bashkim Finon në garën që ka me Armand Dukën, për kreun e FSHF-së. Dhe një pikë e fortë ishte se në klubet shqiptare kishin shkuar tatimet për të rritur presionin që vota të shkonte tek deputeti i PS-së. Por këtë urdhër e ka hedhur poshtë Ministri i Financave dhe Ekonomisë, Arben Ahmetaj, gjatë një konference për shtyp. Ai ka theksuar se ky kontroll është shtyrë pas shkurtit për të larguar çdo aludim se qeveria shqiptare do të ndërhynte në procesin zgjedhor për president të Federatës Shqiptare të Futbollit.
“Kontrolli i Lartë Shtetëror ka lënë rekomandim me shkrim që të bëhet një kontroll në klubet e futbollit dhe Drejtoria e Tatimeve e ka planifikuar. Ka qenë një kujdesje e Kryeministrit që do ishte e shëndetshme që kontrolli tatimor të shtyhej pas zgjedhjeve të FSHF-së që të largojmë çdo dritëhije”, ka deklaruar ministri i Financave dhe Ekonomisë, Arben Ahmetaj. Sqarimi i zotit Ahmetaj u dha pasi në opinion u ngritën zëra se qeveria po implikohej në zgjedhjet për kreun e FSHF-së.
