Ka nisur procesi i zgjedhjes së kryetarëve, zëvendës kryetarëve, anëtarëve dhe zëvendës anëtarëve të vendvotimeve për zgjedhjet lokale të cilat do të mbahen më 15 tetor në Maqedoni.
Komisioni Shtetëror Zgjedhor së bashku me këshillat komunale nisi përzgjedhjen e drejtuesve, ndërsa procesi do të bëhet përmes zgjedhjes së rastësishme dhe do të zgjasë katër ditë.
Përzgjedhja sot do të kryhet për 12 komuna dhe gjithsej do të jenë të emëruar 7908 persona në këshillat zgjedhorë, ndërsa për katër ditë do të zgjidhen 20.886 persona.
Kryesisht përzgjedhja bëhet për kryetar, zëvendës kryetarë, dy anëtarë dhe dy zëvendës anëtarë.
Zëdhënësja e KSHZ-së, Arjeta Xhemaili deklaroi se gjatë përzgjedhjes nuk do të ketë manipulime:
“Nuk mund të ketë ndonjë manipulim, siç theksova baza është marrë nga ministria e Informatikës dhe aty janë të gjithë administrata shtetërore dhe publike”.
Për votim në 80 komisione komunale zgjedhore, do të formohen 3.481 kryesi zgjedhore apo drejtuesit e vendvotimeve. Sipas afateve të KSHZ-së ato duhet të formohen deri më 27 gusht.
