Procesi zgjedhor i 25 qershorit në Shqipëri ka tërhequr edhe vëmendjen e medieve të huaja. Disa prej agjencive ndërkombëtare më të njohura të lajmeve kanë komentuar ditën e djeshme duke konfirmuar se Partia Socialiste po shkon drejt fitores.
Reuters
Agjencia e njohur e lajmeve, ‘‘Reuters’’, ka komentuar zhvillimin e procesit zgjedhor ditën e djeshme në vendin tonë. Parashikimet e saj janë bazuar te sondazhet e zhvilluara nga kompania italiane, IPR Marketing. Duke i cilësuar këto zgjedhje shumë të rëndësishme për rolin që luajnë në nxitjen e reformave gjyqësore, të cilat janë vendimtare për anëtarësimin në Bashkimin Evropian, ‘‘Reuters’’ ka komentuar fitoren e Partisë Socialiste me më shumë se 45% të votave dhe humbjen e Partisë Demokratike me 34% të votave.
Al Jazeera
Al Jazeera, një prej medieve më prestigjioze ndërkombëtare ka komentuar zgjedhjet parlamentare në Shqipëri, duke u përqendruar të parashikojë përfundimin e rezultateve duke u bazuar gjithashtu te sondazhi i IPR Marketing.
Duke cituar Antonio Noto dhe IPR Marketing, Al Jazeera ka parashikuar se PS do të marrë 45% të votave përballë PD-së me 34%, në një garë që nuk ka fituar shumicën e drejtpërdrejtë në asnjërën prej dy zgjedhjeve të mëparshme parlamentare.
Al Jazeera ka përshkruar ditën e votimit dhe e ka nisur shkrimin me faljen madhështorë të namazit të Bajramit nga mijëra myslimanë.
Pasi ka dhënë informacionet analitike, si numri i pjesëmarrësve në zgjedhje, oraret e hapjes së qendrave të votimit dhe numri i vëzhguesve që monitorojnë zgjedhjet, Al Jazeera ka raportuar incidentin e ndodhur në Shën Gjin. Duke iu përmbajtur deklaratës së Luan Ramës dhe thirrjeve të ministrit të Brendshëm, Al Jazeera është kthyer pas në kohë për të kujtuar zgjedhjet e mëparshme pluraliste. Sipas kësaj medie, zgjedhjet shqiptare pas viteve 1990 janë dëmtuar nga mashtrimet, dhuna, rezultatet e diskutueshme dhe rivalitetet e hidhura që shoqërohen me urrejtje.
Al Jazeera shkruan se rëndësia e zgjedhjeve të lira dhe të ndershme është shumë e madhe për anëtarësimin e Shqipërisë në BE dhe përmend reformat e ndërmarra nga qeveria shqiptare. Duke përshkruar atmosferën zgjedhore, Al Jazeera ka treguar se çfarë mendojnë mbështetësit e Edi Ramës, por edhe qytetarët që nuk kanë ndërmend ta votojnë. Dikush thotë se Rama ka sjellë ndryshim rrënjësor, ndërkohë që dikush mendon se varfëria është rritur duke u bërë e papërballueshme.
Vetë kryebashkiaku Veliaj ka bërë një prononcim për Al Jazeera, dhe ka shprehur mbështetjen për kryeministrin Rama, i cili premton rritje ekonomike dhe zbatimin e reformave të ashpra gjyqësore. Por, në shkrimin që tregon këndvështrimin e medieve të huaja në raport me procesin e votimit në Shqipëri nuk ka mbetur pa u përmendur edhe admirimi i Bashës për Donald Trump.
Euronews
Ndryshe nga mediet e tjera, agjencia Euronews ka parashikuar edhe pesë detyrat më emergjente në tryezën e Ramës. Në komentin e saj, Euronews ka konstatuar se problemet më të mëdha të shqiptarëve janë rastet e pazgjidhura të tokës dhe pronësisë, gjyqtarët dhe prokurorët e korruptuar, kultivimi i kanabisit dhe lidhja me krimin e organizuar, papunësia dhe largimi i të rinjve. Si rrjedhim këto janë dhe pikat ku qeveria e ardhshme duhet të përqendrohet për të rimëkëmbur ekonominë e vendit dhe për t’u integruar në BE.
