Një tjetër parti është larguar nga koalicioni opozitar “Shqipëria Madhështore”, i drejtuar nga Sali Berisha. Selami Jenishehri, kryetari i Partisë Bashkimi Popullor i Pensionistëve Shqiptar, ka dorëzuar në KQZ kërkesën për t’u tërhequr nga zgjedhjet e 11 majit 2025, duke e cilësuar procesin si të paligjshëm dhe antikushtetues.
Në kërkesën e tij, Jenishehri argumenton se zgjedhjet e 25 prillit 2021 nuk janë ende të shqyrtuara plotësisht, duke pretenduar se kjo bën që mandatet e Kuvendit të mos jenë të ligjshme dhe, për rrjedhojë, zgjedhjet e reja nuk mund të mbahen.
Më herët, ai kishte deklaruar se ishte gënjyer nga demokratët, të cilët e kishin thirrur vetëm për të firmosur pjesëmarrjen në koalicion, por më pas e kishin përjashtuar nga hartimi i listave.
Ky largim vjen pas disa tensioneve brenda opozitës, ndërsa koalicioni i Berishës përballet me sfida të reja në prag të zgjedhjeve.
