Seanca e parë e Kuvendit për zgjedhjen e presidentit pritet të dështojë, pasi opozita është ende jashtë parlamentit, ndërsa mazhoranca nuk do të propozojë asnjë emër.
Në takimi e tyre të fundjavës, dy krerët e koalicionit qeverisës, Rama dhe Meta, ranë dakord që të kërkojnë edhe konsensusin e opozitës për zgjedhjen e presidentit. E gjitha, për të pasur një figurë sa më konsensuale.
“Në raundin e parë do të shkohet pa kandidat dhe pse socialistët janë të vendosur që deri në minutën e fundit të presin edhe opozitën për të gjetur dakordësi për një kandidaturë konsensuale”, u shpreh kreu i grupit parlamentar socialist, Gramoz Ruçi.
Për zgjedhjen e Presidentit të Republikës zhvillohen 5 raunde votimi; në 3 raundet e para kreu i shtetit zgjidhet me 84 vota, ndërsa në dy raundet e fundit zgjidhet me shumicë të thjeshtë prej 71 votash. Nëse Kuvendi nuk do të arrijë të zgjedhë Presidentin edhe në raundin e pestë, ai shpërndahet dhe shkohet në zgjedhje, të cilat zhvillohen brenda 45 ditëve nga shpërndarja e tij.
