Drejtori Sportiv i Lazios ka një mision mjaft të vështirë para, pasi duhet të gjejë zëvendësuesin ideal të De Vrij i cili u largua drejt Interit. Holandezi ishte një shtyllë mjaft e rëndësishme në ekipin e Inzaghit, pasi sillte garanci në prapavijë dhe silleshe si lider. Por tani fillon misioni për të gjetur zëvendësuesin ideal, i cili priteshe të ishte një emër i madh.
Por Tare ka menduar një tjetër strategji për zëvendësuesin e De Vrij, ku ka surprizuar të gjithë. Ai nuk ka zgjedhur një emër të madh, por i beson sërish instinktit të tij për të marrë në ekip një lojtarë mesatar dhe duke i dhënë besimin e motivimin e duhur të japë më të mirën.
Në mediat italiane është duke u përfolur se futbollisti që po kërkohet me ngulm nga ana e Tares, është Gianmarco Ferrari, 26-vjeçari që ka luajtur me Sampdorian, por kartoni i tij i përket skuadrës së Sassuolës.
Kjo strategji deri tani ka funksionuar më së miri me Taren, pasi kujtojmë Luis Alberton i cili ishte i panjohur deri dje dhe tani është një ndër mesfushorët më të mirë, si dhe goditja më e madhe serbi Milinkovic-Savic i cili sot vlerësohet mbi 100 milionë euro. Por nuk duhet harruar edhe gardiani kuqezi, Strakosha i cili sot vlerësohet mbi 30 milionë euro dhe nuk mungojnë ofertat.
