Zëvendës ministri i Jashtëm grek, Jorgos Katrugalos ka deklaruar se vrasja e Kostandin Kacifës ka helmuar klimën. Këtë deklaratë, ai e bëri gjatë një interviste për radion ‘Real FM’, teksa u fokusua tek marrëdhënia aktuale mes Shqipërisë dhe Greqisë.
Sipas Katrugalos, tashmë të dyja vendet duhet të gjejnë fillin e bisedës, për marrëveshjen e detit.
Zv/ministri ka kërkuar ndër të tjera, respektimin e minoritetit grek nga pala shqiptare:
“Jemi shumë afër të mbyllim të gjitha çështjet e hapura me Shqipërinë, përfshi këtu edhe të zonës detare. Negociatat shkuan shumë pas për shkak të ngjarjes shumë të trishtë me vdekjen e Kacifas, ngjarje që në nivel esencial, nuk ndryshoi diçka nga ecuria e diskutimeve, por patjetër që helmoi klimën. Tani, ajo që kërkojmë është pala tjetër të konfirmojë angazhimet ndaj minoritetit tonë. Kohët e fundit ka miratuar një ligj për minoritetet, presim të konstatojmë praktikisht zbatimin e akteve ekzekutuese. Sepse prioriteti ynë është mbrojtja e të drejtave të minoritetit e me ecurinë e këtij procesi, besoj se vërtet të rigjejmë fillin e bisedës për zonën ekonomike”.
