Mediat raportuan se Donald Trump takoi Emmanuel Macron në Paris këtë të shtunë. Por Presidenti amerikan ishte i shqetësuar nga sikleti i takimeve diplomatike.
Fillimisht, gazeta franceze “Le Monde” raportoi se në një takim të mëhershëm diplomatik në Washington, presidenti amerikan u vu në siklet kur ngatërroi shtetet Baltike me Ballkanin.
Pastaj, në mes të ceremonisë në kryeqytetin francez për të shënuar 100 vjetorin e përfundimit të Luftës së Parë Botërore, një vizitë e planifikuar presidenciale në varrezat amerikane në Belleau, një vend i rëndësisë së veçantë për ushtrinë amerikane, u anulua sepse po binte shi.
Raporti i “Le Monde” flet për ngjarjet në Washington në fillim të prillit të këtij viti, kur liderët e Estonisë, Lituanisë dhe Letonisë vizituan Shtëpinë e Bardhë për një takim dhe një konferencë të përbashkët. Në konferencën për media, Trumpi lavdëroi vizitorët e tij dhe vendet e tyre për anëtarë të mirë të NATO-s dhe për mos-prodhim të “lajmeve të rreme”, raporton “The Guardian”.
Por ndoshta “Le Monde” ka rrezikuar të nxis një postim në Twitter për këtë temë kur raportoi se në takimin privat, “Trumpi u hap duke ia atribuuar [liderëve baltikë] përgjegjësinë për luftën në Jugosllavi”, transmeton Koha.net.
Dalia Grybauskaite nga Lituania, Kersti Kaljulaid nga Estonia dhe Raimonds Vejonis nga Letonia, shkruan gazeta, u stepën “për një moment për të kuptuar se ‘Baltiku’ dhe ‘Ballkani’ po ngatërroheshin në mendjen e presidentit amerikan”.
“Le Monde” shkruante se Trumpi, me sa duket, mbeti “i paarsimuar mbi këtë çështje nga gruaja e tij, Melania, me origjinë nga ish-Jugosllavia”.
Melania Trump është nga Sllovenia, e cila u pavarësua më 1991, në fillim të luftërave të përgjakshme në Ballkan e të cilat përfunduan me luftën e Kosovës më 1998-99.
Shtëpia e Bardhë nuk kishte komentuar menjëherë raportimin e “Le Monde”.
Në Pallatin Elysee të shtunën, Trumpi dhe Macroni u paraqitën mirë para kamerave, pavarësisht një postimi të Trumpit në Twitter të premten ku thoshte se vërejtjet e opozitës rreth nevojës së Evropës për siguri ushtarake ndaj SHBA-së, Kinës dhe Rusisë ishin “shumë fyese”.
Sikurse liderët e shteteve baltike, edhe Macroni vizitoi Washingtonin në prill të këtij viti. Si dhuratë, ai i dërgoi Trumpit një pemë nga Parku Belleau, pemë e cila u zhduk nga oborri i Shtëpisë së Bardhë menjëherë pasi u mboll nga Trumpi e Macroni. Më vonë u tha se ai ishte hequr përkohësisht, për t’u ruajtur.
