Rusia zhvilloi një Botërorë fantastik duke arritur deri në çerekfinale, pavarësisht se në startin e tij ishte një kombëtare pa pretendime dhe që vinte pas një kohe të gjatë pa shënuar fitore. Ndeshja më e madhe dhe historikja që kanë bërë rusët ishte eliminimi i Spanjës edhe pse nga pika e bardhë e penalltisë.
Ishte 1 korrik dhe sapo kishin përfunduar 120’ minutat e përballjes me Spanjën në stadiumin e Luzhnikit dhe fillojnë të bien telefonat. Trajneri rus, Stanislav Cherchesov zbulon se në anë tjetër të telefonit ishte njeriu më i fuqishëm i vendit, Vladimir Putin.
“Vladimir Putin më telefonoi para dhe pas penalltive me Spanjën, mbështetja nga numri një i shtetit ishte mjaft e rëndësishme për ne në atë moment”, – tha trajneri në një konferencë për shtyp. Putin nuk mund të jetë i pranishëm në çdo stadium gjatë Kupës së Botës, por ai ishte i vetëdijshëm se sa i rëndësishëm ishte suksesi i kombëtares ruse në këtë Botëror që ishte edhe vendi organizator.
Telefonata e Putin u është bërë e ditur menjëherë stafit dhe lojtarëve dhe kjo ishte një motiv shtesë që ata të mos dështonin në atë sfidë me Spanjën. “Lojtarët tanë e dinë që Putin po na mbështeste dhe ky është një motivim shtesë për ne”, – tha trajneri Cherchesov. Rusia dhe Kroacia u përballën të shtunën në çerekfinale dhe këtu mbyllet aventura e rusëve në Botërorë, sërish pas ekzekutimit të penalltive.
