Mjaftoi vetëm një ditë pas dekretimit, që Rama të bënte lëvizjen e radhës. Kryeministri i surprizoi të gjithë, teksa i delegoi sot kompetencat zv.ministrit, Gent Cakaj. Ditët e fundit qarkulluan zëra se me shumë mundësi Rama pranoi të merrte përsipër ‘de jure’ postin e kryediplomatit, por ‘de facto’ do t’ia delegonte dikujt tjetër. I referohemi kandidaturës së propozuar që në krye të herës, Gent Cakaj.
Por a ishte dikush që e kishte paralajmëruar këtë stategji? Bëhet fjalë për ish-ministrin e Jashtëm, Paskal Milo, i cili më datën 14 janar e kishte nuhatur këtë lëvizje.
Paskal Milo: Rama formalisht ministër, detyrat do kryhen nga ky person
Sipas Milos, Rama do të jetë vetëm formalisht në krye të kësaj ministrie, sepse dikush tjetër do të kryej aty detyrat e përditshme, dhe me shumë mundësi do të jetë zv/ministri Gent Cakaj.
“Rama përdori termin latin ‘de jure’, dhe jo ‘de facto’, pra vetëm nga ana formale do ta drejtojë ai ministrinë, por në të vërtetë dikush tjetër do të kryej detyrat operative të përditshmërisë. Unë besoj se ky person ka mundësi të jetë vetë Gent Cakaj”, tha Milo në studion e ‘A2’.
