Ministri i Mjedisit në Francë, Nikolas Hulot, ka dhënë dorëheqjen. Lajmin e ka përcjellë me anë të një komunikimi radiofonik ‘live’, pasi ka shprehur pakënaqësitë e shumta në mungesën e progresit për klimën, dhe çështje të tjera mjedisore. Ky vendim mesa duket është surprizë, pasi ai tha për “France Inter radio” se nuk e kishte vënë në dijeni ende Presidentin Emmanuel Macron.
Hulot tha se vendimi i tij erdhi si rezultat i një “grumbulli zhgënjimesh” mbi pamjaftueshmërinë e hapave, për të trajtuar ndryshimet klimatike, për të mbrojtur biodiversitetin dhe për të adresuar kërcënimet e tjera mjedisore.
Ai e ka cilësuar këtë si vendimin më të vështirë që ka marrë ndonjëherë, por sipas tij, është marë në kohën e duhur.
“Ishte ndoshta vendimi më i vështirë i jetës sime, por nuk kam asnjë dëshirë të gënjej veten. Nuk dua të qëndroj me iluzionin dhe prania ime në këtë qeveri dëshmon se jemi në lartësinë e sfidës, ndaj dhe arrita në përfundimin që është më mirë ta lë këtë kabinet”, u shpreh ai në radio.
Hulot është cilësuar si një prej figurave të politikës me popullaritetin më të lartë, dhe largimi i tij do të ishte një goditje ndaj Macron, shkruan “France 24”.
