Shqipëria do të zhvillojë ndeshjen e dytë të Ligës së Kombeve me Skocinë. Një transfertë mjaft e rëndësishme për kuqezinjtë, që në një stadium të zjarrtë “Hampden Park” do të kërkojnë të mos dalin pa pikë.
Trajneri Christian Panucci ka drejtuar stërvitjen e fundit sot para dite në Skoci dhe duket se në formacion do të ketë disa ndryshime nga ai që pamë në përballjen me Izraelin.
Në portë dhe një mbrojtje pritet që të mos ketë ndryshime. Me Strakoshën që ishte shpëtimtari në sfidën e parë, e ka konfirmuar vetë vendin në formacion edhe për këtë sfidë. Ndërsa në mbrojtje pavarësisht gabimeve që u bënë ndaj Izraelit, Panucci duket se do ti besojë sërish Gjimshitit dhe Veselit qendrën, ndërsa nga krahët Hysaj dhe Binaku.
Migjen Basha pavarësisht se zhvilloi një ndeshje mjaft të mirë duket se do të ulet në stol dhe vendin e tij pritet ta marrë Sabien Lilaj, ish-mesfushori i Skënderbeut i cili tashmë luan për Qabala në Azerbajxhan. Tjetër ndryshim që bie në sy është edhe ai i kapitenit të ndeshjes me Izraelin, Hykën. Duket se në vend të tij për këtë sfidë që është mjaft e vështirë trajneri ka zgjedhur Emanuele Ndoji, i cili luan për Breshian. Ndërsa konfirmohen Memushaj, Xhaka dhe Gavazaj në të djathtë.
Në majën e sulmit nuk do të jetë Sidrit Guri edhe pse dha disa shkëndija të mira në ndeshjen e pak ditëve më parë. Trajneri italian në një ndeshje kaq të rëndësishme do ti besojë eksperiencës së Bekim Balajt.
