E keni menduar ndonjëherë se Aleksandër Vuçiç mund të jetë një njohës mjaft i mirë i gjuhës shqipe? Pavarësisht se në daljet për mediat ai tregohet mjaft strikt, presidentit serb i shpëton ndonjë fjalë në shqip kur biseda është private.
Këtë detaj e ka zbuluar gazetari i ‘Tv Klan’ në Beograd, Idro Seferi. “Shumë shpesh, presidenti Vuçiç, në konferenca krijon interaksion me gazetarët dhe sidomos kur flet për Kosovën, e ka qejf të përdorë fjalë shqip dhe më pyet se a është mirë, dhe unë ia kthej që ‘po’”, ka treguar ai në ‘Info Magazine’.
“Vuçiç po ashtu Ferizajt nuk i thotë në serbisht Uroshevac, por në shqip, duke tentuar të tregojë se e njeh situatën”, deklaron gazetari.
Seferi ka treguar edhe për një pyetje që i ka bërë ministrit të Jashtëm, Ivica Daçiç, për Kosovën.
“E kam pyetur se kur do të ndërpresë së lobuari kundër pavarësisë së Kosovës, dhe ai më tha se kur të ndalojë Shqipëria së lobuari pro pavarësinë e Kosovës”.
