Të gjithë e dimë se varësia nga alkooli është shumë e rrezikshme. Të pirit një gotë verë apo disa birra herë pas here është padyshim diçka e mirë, madje sipas shkencës dhe potencialisht e shëndetshme.
Por nëse bëhet i vështirë ndalimi i konsumit të rregullt të alkoolit, një person mund të diagnostikohet me një çrregullim të përdorimit të alkoolit, i njohur më shpesh si alkoolizëm. Njerëzit që pinë sasi të mëdha të alkoolit çdo ditë, janë veçanërisht të rrezikuar të bëhen të varur nga ai.
Dhe tashmë një studim i ri zbulon se sa shumë mund të ndikojë ai në jetëgjatësinë e një personi. Studimi, që përfshinte të dhëna nga mbi 107.000 evropianë, zbuloi se individët e diagnostikuar me një çrregullim të përdorimit të alkoolit, mund të humbin disa dekada të jetës së tyre.
Studimi përfshiu informacione për të gjithë individët në Danimarkë, Finlandë dhe Suedi të cilët u shtruan në spital për shkak të një çrregullimi të përdorimit të alkoolit duke filluar nga viti 1987 deri në vitin 2006.
Kjo është një mostër shumë e madhe, dhe ndërsa të dhënat ishin të kufizuara tek individët nga vetëm 3 vende, rezultatet mund të cilësohen si përfaqësuese të rezultateve të pritshme për popullatën në përgjithësi tek shumë vendeve të tjera.
“Njerëzit e shtruar në spital me çrregullime të përdorimit të alkoolit, kanë një jetëgjatësi mesatare prej 47-53 vjeç për burrat dhe 50-58 vjeç për gratë, dhe vdesin 24-28 vite më herët sesa njerëzit në popullatën e përgjithshme”– shkruajnë studiuesit.
Pas grumbullimit të numrave, studiuesit zbuluan se individët që u shtruan në spital për çrregullim të përdorimit të alkoolit, patën mesatarisht një rënie 24-28 vjeçare në jetëgjatësinë e përgjithshme. Është e panevojshme të thuhet, se kjo është një ulje tepër domethënëse në jetëgjatësi.
Dhe falë një numri të madh hulumtimesh mbi efektet e alkoolit në trupin e njeriut, ne dimë se cilët janë faktorë e rrezikut që shtohen shumë për ata që pinë në sasi të mëdha. Kur bini çdo ditë dhe në sasi të konsiderueshme ajo që vuan nuk është vetëm mëlçia juaj, por edhe zemra dhe sistemi kardiovaskular në tërësi.
Rrahjet e çrregullta të zemrës, goditja në tru dhe ndërlikime të tjera potencialisht serioze, kanë qenë të lidhura edhe me herët me alkoolizmin. Por llogaritja se sa vite jetë mund ti marrë dikujt kjo varësi, është mbresëlënëse.
Nëse ju apo dikush që doni ka një çrregullim të përdorimit të alkoolit, është e rëndësishme
të marrë pa humbur kohë ndihmën e duhur nga një profesionist. Lënia e vesit të rëndë të pirjes së alkoolit pa mbështetjen e duhur mund të jetë e rrezikshëm dhe madje edhe vdekjeprurës, në varësi të rrethanave specifike të personit.
Burimi i lajmit: https://bgr.com/2021/02/04/effects-of-alcoholism-life-expectancy/
Përshtatur nga TIRANA TODAY
