Kryeministri i Maqedonisë, Zoran Zaev ka kërkuar shkarkimin e 2 ministrave. Bëhet fjalë për ministrin pa portofol i angazhuar për implementimin e strategjisë për përmirësimin e gjendjes së romëve Aksel Ahmedovski, si dhe ministrin për investime të huaja, Adnan Qahil.
Madje Zaev ka bërë edhe propozimet përkatëse, teksa në vend të Ahmedovskit ka propozuar kandidatin Muzafer Bajram, ndërsa në vend të Adnan Qahilit është propozuar Elvin Hasan.
Ndërkohë, ndryshime të tjera në qeverinë maqedonase priten pas ndryshimeve kushtetuese. Gjatë muajve të fundit në opinion janë lakuar disa nga emrat që janë më afër largimit.
Siç është përfolur disa herë joyzrtarisht, BDI-ja kërkon alternativa për zëvendësimin e kryeministrit për zbatimin e Marrëveshjes së Ohrit, kurse LSDM-ja është shprehur e pakënaqur me ngecjen dhe shfuqizimin e reformave në arsim.
