Shorti i Champions League që u hodh një ditë më parë, vuri përballë në grupin B, Barcelonën, Tottenhamin, PSV dhe Interin. Zikaltërit kthehen në këtë kompeticion pas një mungese të gjatë, pas problemeve të shumta me presidencën deri një vit më parë kur u ble nga gjigantët kinezë të Suning.
Pas rikthimit, zikaltërit nuk do ta kenë aspak të lehtë në fazën e grupeve, pasi do të përballen me skuadra mjaft të forta dhe që në vitet e fundit kanë në gjirin e tyre lojtarë shumë të mirë. Eric Dier futbollisti i Tottenham Hotspur, ka komentuar kundërshtarët dhe është shprehur se Interi është një ekip i madh.
“Interi është një lloj gjiganti që vetëm ka qenë në gjumë në vitet e fundit”, janë fjalët me të cilat lojtari i ekipit londinez e përshkruan Interin.
“Tottenham ka një histori në Champions League kundër zikaltërve dhe do të jetë e bukur që të luajmë kundër tyre, edhe kundër PSV që është një tjetër ekip i madh i Europës”, vazhdon ai.
Pastaj rreth Barcelonës ai shton: “Jemi në Champions League për të luajtur kundër skuadrave më të mira dhe sigurisht që Barcelona është një prej tyre. Do të jetë një ndeshje fantastike dhe duam të luajmë kundër lojtarëve më të mirë në botë”, shton ai duke e përmbyllur në fund me këtë fjali:
“Megjithatë ne nuk duam që të jetë vetëm një provë sepse duam të luftojmë me të vërtetë kundër tyre”.
