Duket qartë që ky vit nuk është i duhuri për kroatin e Interit, Ivan Perisic. Ai shkëlqeu në Botërorin e Rusisë me kombëtaren kroate duke shkuar deri në finale, por më pas nuk po arrin të tregojë vlerat te zikaltërit. Perisic ka kërkuar të lihet i lirë nga Inter nëse në drejtim të tij vjen ndonjë ofertë. Interi në anën tjetër janë të hapur për largimin e tij, por vetëm nëse një ofertë 35-40 milionë euro mbërrin për të.
Premier League është destinacioni i preferuar për të, dhe vetëm prej andej mund të vijë një ofertë e tillë. Pista Manchester United ka rënë me Solskjaer në krye, por tani është Arsenal që ka bërë një ofertë për kroatin.
Duke parë situatën me Denis Saurez të Barcelonës, “Gunners” kanë ofruar për Perisic huazim deri në fund të sezonit me të drejtë blerje për 40 milionë euro. Që nga ky moment janë pezulluar kontaktet me PSG për të marrë shërbimet e Nkunku.
Kjo ofertë është e kënaqshme për Interin, duke qenë se Perisic është 29 vjeç dhe forma e tij ka shkuar në rënie që pas Botërorit. Gjithsesi me këtë formulë Arsenal mund ta kthejë mbrapsht në Milano kroatin në qershor, nëse ai nuk arrin të tregojë aftësitë e tij më të mira në Londër.
