Trajneri Alban Bushi pritet të bëjë shumë ndryshime në kombëtaren e Shpresave, pasi mosha 1996-97 tashmë e ka mbyllur ciklin dhe duhet të fokusohet tek datëlindja 1998-99. Një numër i madh lojtarësh do ta mbyllin tashmë eksperiencën me kuqezinjtë dhe do të shpresojnë për ftesën e Panuccit për në kombëtaren e madhe.
Një pjesë e lojtarëve të rinj do të vijnë nga U-19, kombëtare që drejtohet nga Bogdani, ndërsa pritet të ketë edhe shumë risi. Telesport ka mësuar dy afrimet e ardhshme të Alban Bushit. Me shumë mundësi, numri një i stolit do t’i dërgojë ftesë mesfushorit me tipare të avancuara, Jason Ceka.
Ky i fundit është një produkt i shkollës gjermane të futbollit. Ai luan për ekipin e dytë të Schalkes dhe shihet me mjaft të ardhme. Me U-19 e ekipit gjerman ka luajtur në 27 ndeshje dhe ka shënuar 7 gola. 18-vjeçari ka qenë i grumbulluar dhe me Gjermaninë U-18. Afrimi i tij do të jetë me mjaft vlerë për skuadrën tonë, pasi mund të kontribuojë për disa vite. Shpresojmë të afrohet sa më shpejt!
Nga ana tjetër, Bushi ka zbuluar dhe një “xhevahir” në Serbi. Fjala është për mbrojtësin e krahut të majtë, aty ku largimi i Hakajt, na lë goxha boshllëk. Fjala është për Faton Xhemailin. Futbollisti është rritur në shkollën gjermane, por më pas ka kaluar në kampionatin e ligës së parë serbe Radnik Surdulica.
Ai ka pasaportë serbe, por dhe kosovare dhe me shumë mundësi Bushi do e ftojë për ndeshjet e ardhshme. Xhemaili ka patur probleme me minutat, pasi 19-vjeçari ka mjaft konkurrencë në skuadër dhe niveli i futbollit serb është shumë i lartë. Ceka dhe Xhemaili me shumë mundësi do të jenë dy shqiponjat e reja të Shpresave.
