Liverpooli është duke menduar që të përforcojë sulmin dhe Jurgen Klopp ka kthyer sytë nga Xherdan Shaqiri. Pas rënies së Stoke Cityt nga elita e futbollit anglez, mesfushori shqiptar pritet ta vazhdojë karrierën diku tjetër. Lojtari i kombëtares zvicerane ka një klauzolë në kontratën e tij e cila kap një vlerë deri në 15 milionë euro, e cila mund të paguhet mjaft lehtë nga anglezët.
Shaqiri, i cili kaloi te Stoke në vitin 2015 nga Interi për 12 milionë paund (13.67 milionë euro), e ka bërë të qartë se nuk e ka në plan të luajë në ligën Championship, mirëpo do t’i pëlqente të qëndrojë në Angli. Deri më tani, Tottenham Hotspuri dhe Southamptoni kanë shprehur interesim për 26-vjeçarin, i cili tash është përfshirë edhe në listën e dëshirave të Liverpoolit. Jurgen Klopp është i interesuar që t’i përforcojë disa pika kyçe në skuadër, mirëpo nuk dihet nëse Redsat mund ta aktivizojnë klauzolën e tij.
Liverpooli ishte shumë pranë transferimit të Shaqirit nga Bayern Munichu në vitin 2014, por asokohe lojtari vendosi të shkonte në Itali. Ndërsa më vonë, mesfushori ka rrëfyer se bavarezët e kishin bllokuar transferimin e tij në Anfield dhe meqenëse nuk kishte minutazhin e duhur me Pep Guardiolan, ai vendosi të shkonte te Interi.
