Mbas një mungese të gjatë pritet të rikthehet në kombëtare mesfushori i Basel, Taulant Xhaka. Ai ka që nga ndeshja me Italinë që nuk grumbullohet për shkak të atij gjesti mbas zëvendësimit. Xhaka ka bërë disa paraqitje mjaft të mira me klubin e tij si në humbjen me Machester Cityn ku ishte ndër më të mirët në kampin e tij, por edhe në fitoren me Benfica-n është vlerësuar maksimalisht. Përpos formës së mirë Panucci mund ta grumbullojë Xhakën për shkak të mungesave të shumta që ka në mesfushë dhe ai luan në të gjitha pozicionet.
Taulant Xhaka është aktivizuar radhazi dhe titullar thuajse në të gjitha ndeshjet e shtatorit. Nëse u referohemi fjalëve të trajnerit Panucci, që nuk ka asgjë me futbollistin dhe e kishte derën e hapur, atëherë me shumë siguri mesfushori i Basel do të grumbullohet për dy ndeshjet e tetorit, me Spanjën më 6 tetor dhe me Italinë më 9 tetor, të vlefshme për eliminatoret “Rusi 2018”. Christian Panucci do të publikojë listën më 29 shtator dhe risia kjo pritet të jetë, përfshirja e Taulant Xhakës, por edhe ndonjë prurje e re, ku është përfolur Emanuele Ndoj i Breshias.
Ndaj Spanjës do të mungojë Mavraj, Roshi dhe Kukeli për arsye kartonësh, ndërsa Abrashi mbetet jashtë për arsye dëmtimi. Edhe Andi Lila është në dyshim, pasi u dëmtua fundjavën e kaluar. Në fakt, më shumë se për ndeshjen me Spanjën në transfertë, që është mision i pamundur për të marrë një pikë, kuqezinjtë dhe stafi po mendojnë për ndeshjen me Italinë në “Loro Boriçi”, ku me ndihmën edhe të tifozëve, mund të arrihet një rezultat pozitiv, për faktin se edhe ekipi është më i kompletuar pas rikthimeve nga pezullimet.
