Kryetari i degës së Partisë Demokratike për Durrësin Ferdinand Xhaferri, ka deklaruar se do ketë rishikim të projekteve dhe analizë ekonomike të gjitha investimeve që ka kryer bashkia e Durrësit përgjatë viteve të fundit.
Shkak për këtë dalje publike të kreut të PD-së është bërë një rrethrrotullim që Bashkia bëri pak ditë më parë në qendër të qytetit dhe pas përfundimit e ktheu menjëherë në gjendjen e mëparshme pasi shkaktonte kaos në trafik. Deklarata e kryedemokratit të Durrësit u bë në një dalje publike në qendër të qytetit bregdetar.
Xhaferri tha se Dako po shpërdoron fondet publike dhe nuk po menaxhon si duhet taksat e qytetarëve durrsakë, ndërsa duke iu referuar rrugës së plazhit theksoi se me ardhjen e PD në krye të Durrësit ai segment, por edhe investime të tjera, do të ribëhen duke u konsultuar me ekspertë të mirëfilltë dhe qytetarë.
Jemi sot për tu paraqitur me fakte konkrete sesi paaftësia, papërgjeshmëria, korrupsioni, abuzimi, arrogaca janë bërë të gjitha bashkë tek kryetari i bashkisë së Durrësit, Vangjush Dako, duke na shkaktuar veç të tjerave një masakër urbanistike në qytet. Bëhet rrugë, ribëhet rrugë. Dako e kthyer Durrësin në bastion të krimit. Po evidentojmë problemet që ka qyteti.
Sipas Xhaferrit, lidhja me krimin dhe vizioni që ai ka për qytetin, e bëjnë Vangjush Dakon të padenjë për të drejtuar Durrësin.
Bashkia e Durrësit ka kryer një sërë investimesh që nuk janë pritur mirë nga qytetarët durrsakë, siç është ngushtimi i rrugëve dhe zgjerimi i trotuareve, deri tek rruga “Pamvarsia” në Plazh, e cila shkakton kaos në trafik gjatë muajve të verës.
