41-vjeçari Wladimir Klitschko ka vendosur të tërhiqet përfundimisht nga boksi. Ish-kampioni i botës në peshat e rënda tha se ka arritur të gjitha sukseset dhe se tashmë do të nisë një karrierë të re.
Tërheqja e tij nënkupton se boksieri nuk do ta zhvillojë ndeshjen e revanshit me Anthony Joshua, ndaj të cilit humbi në raundin e 11 në sfidën e zhvilluar në prill në Wembley.
Wladimir Klitschko e mbylli karrierën e tij si boksier me bilancin 64 fitore dhe 5 humbje.
Boksieri fitoi medaljen e artë në Lojërat Olimpike të Atlantës në 1996, ndërkohë që një vit më vonë u bë boksier profesionist.
Ai regjistroi një rekord prej 24 fitoresh e asnjë humbje përpara se të humbiste me Ross Puritty në vitin 1998, në ndeshjen e vetme të zhvilluar në Ukrainë.
Në vitin 2000, Klitschko fitoi titullin botëror në WBO pas fitores me amerikanin Chris Byrd, ndërsa në 2003 dhe 2004 u mposht nga Corrie Sanders dhe Lamon Brewster. Pas kësaj, për 11 vjet Klitschko nuk njihte humbje, deri në nëntor të vitit 2015, kur i dorëzoi titujt në WBA, IBF dhe WBO britanikut Fury.
