Deontay Wilder do të mbrojë më 3 mars titullin kampion bote në peshat e rënda të kategorisë WBC ndaj kubanezit Luis Ortiz. Boksieri amerikan është një ndër më të rrezikshmit e ringut, pasi nuk njeh humbje dhe në përballjen e fundit për mbrojtje titulli me Stiverne, e rrëzoi në tokë që në raundin e parë. Aftësitë e tij janë të mrekullueshme dhe kjo ka bërë që të dashurohen pas tij shumë fansa.
Kjo mbetet padyshim sfida më e vështirë për Wilder në 39 duele të karrierës së tij, të gjitha të fituara, por edhe Ortiz është një boksier që nuk e njeh fjalën humbje. Pavarësisht kësaj, amerikani e konsideron sfidën “normale”, si gjithë të tjerat dhe gati për të hedhur në tapet një tjetër rival edhe pse i pamposhtur. “Luis do të mësojë për herë të parë fjalën humbje edhe pse në një moshë të madhe. Më vjen keq për të, por unë kam një karrierë për të çuar përpara”, u shpreh Deontay Wilder.
“Jam në formë dhe gati për t’u ngjitur sërish në ring, për t’i treguar Ortiz se me mua nuk bëhet shaka, se ai po luan me vdekjen. Sa do që të lëvizë në ring, ai nuk ka asnjë shans t’i shpëtojë grushtit tim. Kjo sfidë do të më afrojë edhe më shumë drejt unifikimit të titujve kampionë bote në peshat e rënda, për të qenë më i miri. U them rivalëve të mos fshihen, por të përballen me më të mirin”, tha 32-vjeçari Deontay Wilder, 39 fitore (38 me KO) dhe asnjë humbje në karrierë. Ndërsa 38-vjeçari Luis Ortiz ka 28 fitore (24 me KO) dhe asnjë humbje në karrierën e tij. Kjo sfidë e peshave të rënda në boks do të zhvillohet në Nju Jork.
